سپینې ماڼۍ له پاکستان او طالبانو غوښتي چې د یو بل پر وړاندې له زغم کار واخلي
طالبانو هغه مهال پر ډیورنډ فرضي کرښه د پاکستان پر پوستو برید وکړ چې اسلام اباد په پکتیکا او خوست ولایتونو کې هوايي بریدونه وکړل.
د افغانستان پر خوست او پکتیکا ولایتونو د پاکستان د بمبارۍ په تعقیب پر ځینو پاکستاني پوځي بنسټونو د طالبانو له بریدونو وروسته په لومړي غبرګون کې د امریکا متحده ایالتونو د ‘زغم’ غوښتنه کړې ده.
پر ملکي وګړو د امریکا خواشیني
امریکا وايي، پاکستان کې د اورپکو له لوري بریدونو کې د خلکو پر وژل کېدو او په افغانستان کې د بمباریو پرمهال د ولسي خلکو پر وژل کېدو ‘ژوره’ خواشیني ښيي.
د امریکا ولسمشرۍ ماڼۍ اطلاعاتو سکرترې کرېن ژان پېري په افغانستان کې د طالبانو له حکومته وغوښتل چې باوري کړي، چې پر نورو د بریدونو لپاره ترهګر له افغان خاورې ګټه وانخلي. له ځايي وخت سره سم پر دوشنبې یوې خبرې غونډې ته وینا کې اغلې جین-پیري وویل، “امریکا ژمنه ده، چې افغانستان به نه پرېږدي، چې بیا د هغو ترهګرو په پټنځای بدل شي، چې غواړي امریکا، د امریکا ملګرو او متحدو هېوادونو ته زیان ورسوي.”
نور ولولئ: امرالله صالح وايي، انور کاکړ د څو ورځو صدراغظمۍ په خاطر خپل قوم ته سپکاوی کوي
نور ولولئ: تحریک طالبان پاکستان په فبرورۍ کې ۱۷۲ پاکستاني پوځیان او پولیس وژلي
نور ولولئ: پر افغان خاوره د پاکستان برید او د طالبانو چټګ غبرګون
امریکا له افغانستان سره په ګاونډ شمالي وزیرستان کې د یوه برید په ترڅ کې د ملکي وګړو د مرګ ژوبلې او په افغانستان کې د هوايي برید پایله کې د ولسي وګړو پر وژل کېدو “ژوره” خواشینې ده.
پر دواړو خواوو د امریکا غږ
اغلې پیري ویلي، “موږ په طالبانو غږ کوو چې ډاډ ترلاسه کړي د افغانستان له خاورې څخه ترهګریز بریدونه نه کېږي او موږ له پاکستانه غواړو چې له زغم څخه کار واخلي او ډاډ ترلاسه کړي چې د دوی د ترهګرۍ ضد هڅو کې ملکي وګړو ته زیان نه رسېږي.”
له دې مخکې د دوشنبې په ورځ په افغانستان کې د طالبانو د حکومت ویاند ذبیح الله مجاهد وویل چې د پاکستان د پوځ الوتکو د افغانستان په جنوب ختیځ پکتیکا او خوست ولایتونو کې پر کورونو بمباري کړې چې له امله یې د دریو ماشومانو او پنځو ښځو په ګډون اته تنه وژل شوي دي.
اسلام اباد تایید کړه چې د دوی ځواکونو د اورپکو په اهدافو بریدونه کړي او د افغانستان حاکمیت ته یې د درناوي ډاډ ورکړی.
وروسته، طالبانو غچ اخیستونکي بریدونه پیل کړل او د ډیورنډ فرضي کرښې په اوږدو کې یې د پاکستان پوځي تاسیسات په نښه کړل.
