اهل هنود او سېکانو له طالب چارواکو سره په کتنه کې ویلي، چې ددوی ډیرې ځمکې غصب شوې دي
کره شمېرې ښیي چې د کابل په دوه ویشتو ناحیو، غزني، خوست، پکتیا، ننګرهار او ځینو نورو ولایتونو کې د اهل هنود زیات شمېر ځمکه د خلکو له لوري غصب شوي او اوس دوی له طالبانو غواړي چې په دې برخه کې ورسره همکاري وکړي.
ریاست الوزراء د یوې خبرپاڼې په خپرولو سره د کابل ښار د ۲۲ ناحیو له یو شمېر مشرانو، وکیلانو، د شیعه ګانو او سېکانو له استازو د مولوي عبدالکبیر د ناستې خبر ورکړ.
اهل هنود او سېکانو په دې کتنه کې د دوی د ستونزو د حل غوښتنه کړې ده.
په کابل کې د دوی د ملکیتونو غصب
د اهل هنود او سېک استازو د طالبانو د رییس الوزراء له سیاسي مرستیال مولوي عبدالکبیر سره په لیدنه کې وویل، چې په کابل ښار کې د دوی ملکیتونه غصب شوي دي.
دوی د خپلو ځمکو د بېرته راګرځولو غوښتنه کوي او ټینګار کوي، چې د دوی حقوقي ستونزو ته دې د حل لاره وموندل شي.
نور ولولئ: سېکان په تدریجي ډول افغانستان پرېږدي
نور ولولئ: ۵۵ سکهان او هندوان له افغانستانه هند ته ولاړل
ریاست الوزراء په یوې خبرپاڼه کې همداراز لیکلي، چې مولوي عبدالکبیر د کابل ښار د ۲۲ ناحیو له یو شمېر مشرانو، وکیلانو، د شیعه نو او سېکانو له استازو سره کتلي دي.
ددې خبرپاڼې له مخې، مولوي عبدالکبیر په دې لیدنه کې ژمنه کړې چې، د شیعه ګانو او اهل هنود وګړو د ستونزو د حل په موخه به لازم اقدامات وشي.
د طالبانو په حاکمېدو سره اهل هنود له هېواد وتلي
پر افغانستان د طالبانو له واکمنۍ وروسته ډیری اهل هنود او سیکان د افغانستان پرېښودو ته اړ شوې دي.
پر دغو لږکیو د طالبانو له واکمنۍ وروسته په افغانستان کې څو ځلې بریدونه شوي دي او د یو شمیر بریدونو مسوولیت هم داعش ډلې په غاړه اخیستی وه.
د ۱۴۰۰ لمریز کال د تلې په میاشت کې د کابل په کارته پروان سیمه کې وسله والو کسانو چې ځانونه طالب چارواکي معرفي کړي ول، چې د سېکانو عبادت ځای ته ننوتل او د هغوی وسایل یې له منځه یوړل.
داسې راپورونه هم خپاره شوي وو چې طالبانو د داعش په نوم د سیکانو او اهل هنود پر عبادت ځایونو او نورو راټولېدنو بریدونه کړي وو چې ګڼه مرګ ژوبله یې لرله، خو طالبانو یې نېغه پړه پر غاړه نه اخیسته.
