ملګري ملتونه وايي چې د افغانستان په لرې پرتو سیمو کې ډېری مېرمنې د زیږون پر مهال مړې کېږي
د افغانستان په لرې پرتو سیمو کې چې روغتیايي خدمات د نشت برابر دي، د زیږون پر مهال د مېرمنو د مړینې کچه لوړه شوې ده.
د ملګرو ملتونو د وګړو صندوق وايي چې د افغانستان په لرې پرتو سیمو کې ډېری مېندواره مېرمنې د زېږون پر مهال ژوند له لاسه ورکوي.
دغه سازمان پنجشنبه د سلواغې پر ۱۹مه په خپله ایکسپاڼه کې لیکلي چې د افغانستان په لرو پرتو کلیو کې ډېری ښځې روغتیايي خدماتو ته لاسرسی نه لري.
د کورني روغتیايي کورونو جوړل
یاد بنسټ زیاته کړې چې په لرې پرتو سیمو کې د مېندوارو مېرمنو او د ماشوم د ډاډمن زیږون په پار له ښځو سره د مرستې لپاره «کورني روغتیایي کورونه» جوړوي.
ورته مهال د کډوالو نړیوال سازمان هم ویلي چې دمګړۍ په افغانستان کې د ۱۱ روغتیايي کورونو پر جوړولو بوخت دی.
د دغه سازمان په خبره، د دغو روغتیايي مرکزونو ۸۰ سلنه کار بشپړ شوی دی.
نور ولولئ: که افغان ماشومانو سره مرستې ونهشي روان کال به ډېری ماشومان مړه شي
نور ولولئ: بریتانیا د ښځو او ماشومانو لپاره خپلې بهرنۍ مرستې کموي
نور ولولئ: طالبان د خصوصي روغتونونو د ښځینه ډاکټرانو او همکارانو معلومات څه کوي؟
له دې وړاندې د ملګرو ملتونو له ماشومانو د ملاتړ صندوق (یونیسف) ویلي و چې په افغانستان کې ۹.۵ میلیونه کسان داسې سیمو کې ژوند کوي چې په وینا یې، روغتیايي خدماتو ته لاسرسی نه لري.
ورته مهال د بې پولې ډاکټرانو سازمان هم ویلي و چې د افغانستان روغتیايي سیسټم د سرچینو او بودیجې د کمښت له امله له ګڼو ننګونو سره مخ دی.
پر افغان نجونو د طالبانو محدودیتونه
پر افغانستان د طالبانو له دویم ځل واکمېدو سره دغه ډلې افغان نجونې له زده کړو راوګرځولې او ددوی پر مخ یې د ښوونځیو او پوهنتونونو دروازې وتړلې.
شاوخوا دوه کاله کېږي چې افغان نجونې له زده کړو راګرځول شوي دي.
شنونکي وايي چې د نجونو پر مخ د پوهنتونو او ښوونځیو تړل کېدل د افغانستان د پرمختګ لپاره نه جبرانېدونکی زیان دی.
دوی زیاتوې چې که دغه حالت دوام وکړي، نو کېدای شي په راتلونکو کلونو کې د ښځینه ډاکټرانو، نرسانو، قابلې له کمبود او د طب برخې نورو مسلکونو کې له جدي بحران سره مخامخ شو.
څه موده وړاندې د طالبانو د روغتیا برخې وزیر قلندر عباد هم ویلي وو، چې په روغتونونو کې د ښځینه مسلکي ډاکټرانو له جدي ستونزې سره مخامخ دي.
که نجونو ته طالبان د زده کړو اجازه ورنه کړې، کېدای شي افغانستان کې د مور او ماشوم مړینه نوره هم لوړه شي.
