د افغانستان په ختیځ ننګرهار ولایت کې ځايي چارواکي وايي د ننګرهار د څلورم فارم په نږدې ۵۰۰ جریبه ځمکه کې د مالټو د باغونو د جوړولو کار پیل شوی دی. ننګرهار کې د کانال پروژه د افغانستان تر ټولو لویه کرنیزه پروژه ده.
د دې پروژې اړوند په دریم فارم کې په څه کم ۲۹۰۰ جریبه ځمکه کې د مالټو باغونه زرغون دي. د ننګرهار د کرهڼې ریایت د ویاند سید همایون غریبمل په وینا په تېره یوه اونۍ کې پر شاخوا ۵۰۰ جریبه ځمکه کې د مالټو د نویو باغونو لړۍ پیل شوې ده.
د نوموړي په وینا د مالټو نوي باغونه پر هغو ځمکو جوړېږي چې په تېرو ۴۰ کلونو کې هېڅ ډول کښت په کې نه و شوی. د ښاغلي غریبمل په وینا خصوصي شرکتونو د ازادې دوطلبۍ له مخې د مالټو د باغونو جوړولو قراردادونه ترلاسه کړي او اوس یې د باغونو د جوړولو چارې پیل کړي دي. چارواکي وايي حاصل ته د مالټو د باغونو د رسولو په چاره کې به کانال هم له دې خصوصي شرکتونو سره مرسته کوي چې د مالټو باغونو ته د اوبو رسول هم په کې راځي.
نور یی ولوله | پیسته د موسمي ناروغیو ترڅنګ نورې ګټې هم لري
دغه راز د کانال لخوا به مسلکي مشورې ورکول کېږي او په نورو برخو کې به هم ورسره همکاري کېږي. د ننګرهار د کرهڼې ریاست چارواکي وايي خصوصي شرکتونه کولای شي چې د مالټو د باغونو شاخوا ځمکو کې د خرما باغونه او نورو هغه څه چې دوی ته ګټه رسوي هم جوړ کړي. دا په داسې حال کې ده چې په تېرو څو کلونو کې وچکالۍ په ننګرهار کې د مالټو باغونه اغیزمن کړي وو خو چارواکي وايي چې له وروستیو ورښتونو سره اوس د اوبو د کمښت ستونزه هواره شوې ده.
د مالټو د نویو باغونو په جوړولو کې ګڼو کسانو ته د کار زمینه هم برابره شوې ده. تېر کال د وچکالۍ له امله د مالټو باغونه اغیزمن شوي وو او چاروکو ویل چې حاصلات یې کم شوي وو. ننګرهار کې چې د نارنج او مالټې د حاصل لپاره تر ټولو مناسبه سیمه بلل کېږي، د اوبو د لږ والي له امله بڼوالو ښه حاصل نه و ترلاسه کړی.
د ننګرهار د نارنجونو اومالټو حاصلات پخوان کلونو کې ترمنځنۍ اسیا هم رسېدل خو په کورنیو جګړو د نورو بنسټونو په څير دولتي فارمونه هم له بې غورۍ وچ او بې برخلیک وو.په تیرو شلو کلونو کې دغو بڼو ته یو ځل بیا پام وراوښتی دی.
