افغان لوبډلې د هند ۱۸۲ هدف پوره نه کړای شو او په ۲۰ اورونو کې یې یوازې ۱۳۴ منډې وکړې

افغان لوبډلې د ۲۰۲۴ کال ۲۰اوریز نړیوال جام د اته سوپر لوبډلو ۸ پړاو کې خپله لومړۍ لوبه هند ته وبایلله.

هاخوا په ټولنیزو رسنیو کې د افغان لوبډلې مینه والو په اوپنینګ کې میدان ته له رحمان الله ګربز سره د حضرت الله ځاځي پر ښکته کېدو نیوکه کوي. دغه مینه وال وايي، چې په اوپنېنک باید د پخوا په څېر ابراهیم ځدراڼ او رحمان الله ګربز لوبېدلي وای.

هندي لوبډلمشر روهېت شرما د لوبې پچه یا ټاس وګاټه او لومړی یې خپله د منډو جوړولو پرېکړه وکړه.

هندي لوبډلمشر خپله وېکټه ژر وبایلله. ورپسې نورو لوبغاړو نسبتا ښه ملګرتیا وکړه او منډې یې تر ۱۸۱ ورسولې. د هندي لوبغاړو ترمنځ سوریاکمار تر نورو ډېرې ۵۳ منډې وکړې. هارډېک پنډیا ۳۲ او ویرات کهولي د ۲۴ منډو په جوړولو وتوانېدل.

د افغان بالرانو غوره لوبه

د افغان توپ اچونکو ترمنځ راشد خان او فضل الحق فاروقي درې – درې او نوین الحق یوه وېکټ واخیسته. یو بل لوبغاړی هم په منډه (رن اوټ) شو.

افغان لوبډلې په توپوهنه کې خپلې وېکټې ژر ژر له لاسه ورکړې. د افغان لوبغاړو ترمنځ تر ټولو ډېرې منډې عظمت الله عمرزي ۲۶ منډې وکړې. نجیب ځدراڼ په ۱۹ او ګلبدین نایب په ۱۷ منډو وسوځېدل.

نور ولولئ:  افغان کرېکټ ملي لوبډلې په دویمه ۲۰اوریزه سیالۍ کې ایرلنډ مات کړ

نور ولولئ: د افغان کرکټ ملي لوبډلې او سري لنکا تر منځ لوبو ته کتنه

دوی په ټاکل شویو شلو اوورونو کې یوازې ۱۳۴ منډې وکړې او هند دغه لوبه د ۴۷ منډو په توپیر وګټله.

په نننۍ لوبه کې په افغان لوبډله کې یو بدلون راغلی و او کریم جنت پر ځای حضرت الله ځاځی لوبډلې ته شامل کړای شوی و.

د افغان لوبډلې دوه پاتې لوبې

افغانستان خپله بله لوبه د جون په ۲۳مه نېټه له اسټرالیا سره لري او وروستۍ لوبه یې د جون په ۲۵مه له بنګله دېش سره ده.

افغانستان نن د ۲۰۲۴ کال شل اوریز نړیوال جام د اتو غوره لوبډلو یا سوپر ۸ پړاو کې له هند سره لوبه لرله.

دا په دې پړاو کې د افغانستان او هند دواړو لومړنۍ لوبه وه.

د افغانستان او هند کرېکټ ملي لوبډلې ترمنځ دا لوبه د کرابین د بارباډوز ټاپو په مرکز برېج‌ ټاون کې وشوه.

د افغانستان کرېکټ بورډ او له ملي لوبډلې سره مله روزونکي له لوبې مخکې ویلي وو دې لوبې ته یې بشپړ چمتووالی نیولی دی.