کناري ټاپوګانو ته نږدې د ۲۰۰ کډوالو د لېږدونکې بېړۍ ورکېدل
![1000x563 cmsv2 480a54bf ca9a 5835 91cc 13215a498252 6656806](https://afghannow.net/wp-content/uploads/2023/07/1000x563_cmsv2_480a54bf-ca9a-5835-91cc-13215a498252-6656806-348x196.jpg)
د اسپانیا کناري ټاپوګانو ته ور څېرمه د ۲۰۰ کډوالو لېږدونکې بېړۍ ورکه شوي ده
سمندري مرستندویانو له څو ورځو راهیسې د ورکې شوې بېړۍ لټون کوي. اسپانیا کې مرستندویان وايي د دغه هېواد کناري ټاپو ګانو ته څېرمه اوبو کې د یوې ورکې شوې بېړۍ په لټون بوخت دي، چې تر ۲۰۰ ډېر کډوال یې لېږدول.
د دې بېړۍ په اړه ویل شوي چې پر تری تم کېدو یې له یوې اوونۍ ډېر وخت اوړي.
د واکېنګ بورډرز په نوم مرستندویه ډلې ویلي، د کب نیوونکې دې بېړۍ د سنیګال سویل کې له کافونټاین ساحلي ښاره حرکت کړی و.
په دې بېړۍ کې ماشومان هم وو
د اسپانیا د افې خبري اژانس د رپوټ له مخې د دې بېړۍ په مساپرو کې ګڼ شمېر ماشومان هم دي.
رپوټونو کې ویل شوي چې دوه نورې ورته بېړۍ هم چې لسګونه کسان پکې سپاره دي، بې درکه شوې دي.
د اسپانیا سمندري مرستندویانو افې خبري اژانس ته ویلي چې د لټون دغو عملیاتو کې چورلکې هم مرسته کوي.
نور ولولئ: په لادرکه شوي اوبتل کې د ټولو سپرو کسانو د مړينې اعلان
د دوو نورو بې درکه بېړیو په اړه ډېر جزییات نه دي خپاره شوي.
خو رویټرز خبري اژانس د واکېنګ بورډرز ډلې د یوې غړې ‘هلېنا مالېنو’ په حواله لیکلي چې له دوی په یوه بېړۍ کې ۶۰ او په بله کې ۶۵ کسان سپاره دي.
په دې توګه د دغو درېواړو ورکو شویو بېړیو د مساپرو ټول شمېر پر ۳۰۰ کسانو اوړي.
مدیترانې سمندر کې د کډوالو ورته مړینې
د مدیترانې سمندر کې د کډوالو د مړینې یوه ډېره مرګونې پېښه څو اوونۍ وړاندې هغه مهال رامنځته شوه چې د یونان سواحلو ته نږدې یې لېږدونکې بېړۍ ډوبه شوه.
د یونان سمندري ځواکونو تر اوښتلو وړاندې د بېړۍ دا عکس خپور کړی
د رپوټونو له مخې په هغې بېړۍ کې سلګونه کسان سپاره وو.
له دوی د ۷۸ کډوالو مړي موندل شوي، خو له ۵۰۰ ډېر نور یې لا هم تری تم دي.
دغه بېړۍ له لوېدیزې افریقا د اروپا په تکل خوځېدلې وه.
ناقانونه کډوال پر دې مرګونې لار ډېر وخت د کب نیوونې په کوچنیو بېړیو کې انتقالېږي.
دغه بېړۍ ډېرې خوندي نه وي او له سمندري څپو سره یې د اوښتلو امکان ډېر دی، خو قاچاقچیان بیا هم پکې تر ټاکلې اندازې څو برابره ډېر کسان پورته کوي.
د ملګرو ملتونو د کډوالو اداره وايي تېر کال نږدې ۵۶۰ کسان د اسپانیا ټاپوګانو ته د رسېدو د هڅو په لړ کې مړه شوي دي.