کونړ او نورستان کې سېلابونه د دوو ختیځو ولایتونو اوسېدونکو ته درانه مالي او ځاني زیانونه اړولي دي. سیمهییز چارواکي وایي، په کونړ کې دوه کسان مړه شوي او په نورستان کې درې ماشومان لا هم ورک دي.
کونړ کې دوه کسان د سېلابونو له امله مړه شوي
د کونړ د طبیعي پېښو پر وړاندې د مبارزې ادارې ویلي، د نورګل ولسوالۍ د تنګي سهیل په سیمه کې د سختو بارانونو له امله راوتلو سېلابونو دوه کسان مړه کړي او خلکو ته یې پراخ مالي زیانونه هم اړولي دي.
چارواکي وایي، د زیانونو د کچې د معلومولو او د نورو احتمالي مرګژوبلو د ارزونې چارې لا هم روانې دي.
کونړ او نورستان کې سېلابونه؛ نورستان کې درې ماشومان ورک دي
په همدې حال کې، کونړ او نورستان کې سېلابونه د نورستان برګمټال ولسوالۍ هم سخت ځپلې ده. د سیمهییزو چارواکو په وینا، په دې ولسوالۍ کې درې ماشومان د سېلابونو له امله ورک شوي او د موندلو لپاره یې د ژغورنې ډلې هڅې کوي.
د معلوماتو له مخې، سېلابونو ۸۷ کورونه، یو جامع جومات، د اوبو لګولو کانالونه، د برېښنا ځینې تاسیسات او ګڼې کرنیزې ځمکې زیانمنې کړې دي.
د هوا پېژندنې ادارې مخکې خبرداری ورکړی و
د افغانستان د هوا پېژندنې ادارې تر دې پېښو مخکې د کونړ، نورستان او یو شمېر نورو ولایتونو لپاره د سختو بارانونو او ناڅاپي سېلابونو خبرداری ورکړی و.
په وروستیو ورځو کې د هېواد په بېلابېلو سیمو کې پرلهپسې بارانونو او سېلابونو خلکو ته د سر او مال درانه زیانونه اړولي دي.
وروستۍ خونړۍ پېښه
دا لومړی ځل نه دی چې کونړ او نورستان کې سېلابونه درنې مرګژوبلې رامنځته کوي. د روان کال د سرطان په ۲۹مه هم د نورستان د مرکز پارون ښار او د دغه ولایت په یو شمېر نورو سیمو کې د سېلابونو له امله لږ تر لږه ۴۰ کسان وژل شوي وو. کونړ او نورستان کې سېلابونه
چارواکي له خلکو غواړي چې د سختو بارانونو پر مهال د سیندونو، ویالو او نورو خطرناکو سیمو له نږدې کېدو ډډه وکړي او د اړوندو ادارو خبرداریو ته جدي پاملرنه وکړي.
