د طالبانو محکمو د قصاص او سنګسار شاوخوا ۲۰۰ حکمونه صادر کړي
![77 92](https://afghannow.net/wp-content/uploads/2023/05/77_92.jpg)
د افغانستان ستره محکمه چې د طالبانو له خوا اداره کیږي وايي چې دغې محکمې تراوسه د قصاص، دیه، سنګسار او رجم شاوخوا ۳۰۰ حکمونه صادر کړي دي
د سترې محکمې ادارې مرستیال عبدالمالک حقاني د پنجشنبې په ورځ د مې څلورمه په یو ویډیوي پیغام کې چې د دغې محکمې د ټویټر په پاڼه خپور شوی ویلي چې د طالبانو تر کنټرول لاندې محکمې حدود او قصاص عملي کیدو ته ژمنتیا لري.
د سترې محکمې ادارې مرستیال ویلي چې تراوسه ۱۷۵ کسانو ته د قصاص، ۷۹ کسانو ته د دیه (خونبها) د ورکولو او ۳۷ نورو ته د سنګسار د سزاګانو حکمونه صادر شوي دي.
نور ولولئ: طالبانو په پکتیا کې پنځه تنه عام محضر کې په درو وهلي
همداشان څلور تنه چې ښاغلي حقاني بدکاران بللي د محکمو د حکم له مخې تر دیوال لاندې شوي دي.
د طالبانو د سترې محکمې د مرستیال د مالوماتو پر اساس ۱۰۳ تنو باندې شرعي حدود او ۱۵۶۲ تنو نورو ته تعزیري سزاګانې ورکړل شوې دي.
د طالبانو د حکومت د سترې محکمې دغه چارواکي ویلي د طالبانو د محکومو ځینې پریکړې عملي شوي او ځینې نورې د عملي کیدو په حال کې دي
د عبدالمالک حقاني د وینا له مخې د “حدود او قصاص” اړوند قضیو باندې پریکړې ډیر دقت ته اړتیا لري او دا ډول قضیې طالبانو د سترې محکمې د عالي شورا او د حکومت د کابینې د پریکړو وروسته د طالبانو د مشرتابه له خوا د ارزونې او څیړنې وروسته تائید او عملي کیږي.
د طالبانو محکمو د قصاص، دیه، سنګسار او رجم په ګډون دا پریکړې په داسې حال کې کړي چې د طالبانو مشر ملا هبت الله اخوندزاده د تیر لمریز ۱۴۰۱ کال په وروستیو کې د دغو محکمو د یو شمیر قاضیانو سره په کتنه کې په محکمو کې د شریعت د احکامو په تطبیق ټینګار کړی و.
د طالبانو د محکمو له خوا دغه ډول پریکړو ته په نړیواله کچه غبرګونونه ښودل شوي دي
د اروپايي پارلمان ريیس روبرتا متسولا د تیرکال د اکتوبر په میاشت کې د طالبانو له خوا په عام محضر کې د درو د وهلو د سزا د تطبیق وروسته ویلي و چې نړۍ به ډیر ژر په افغانستان کې په عام محضر کې د اعدام او سنګسار د سزاګانو د تطبیق شاهده هم اوسي.
نور ولولئ: د امریکا محکمه: د افغانستان کنګل شوې پیسې دې د سپتمبر ۱۱مې د قربانیانو کورنیو ته نه ورکول کېږي
همداشان د طالبانو له خوا د دغو سزاګانو تطبیق په اړه ځینو نورو هیوادونو او نړیوالو سازمانونو هم غبرګون ښودلی او د طالبانو له خوا دا ډول سزاګانې یې غندلي دي.
خو د طالبانو د حکومت ویاند ذبیح الله مجاهد د تیر لمریز کال د قوس په میاشت کې په عام محضر کې مجرمانو ته د شرعي سزاګانو او شرعي حدودو د تطبیق په اړه د نړیوالو ادارو او لودیځو هیوادونو دا انتقادونه د اسلام دین ته سپکاوی ګڼلی و.
طالبانو د ۱۹۹۶ او ۲۰۰۱ کلنو ترمنځ د خپلې واکمنۍ په لومړي ځل هم په افغانستان کې په عام محضر کې د قصاص د سزا په ګډون شرعي سزاګانې تطبیقولې.