د طالبانو د بهرنیو چارو سرپرست وزیر زیاتوي چې رسمیت پېژندنه د فشار په توګه کارول کېږي
د طالبانو د بهرنیو چارو وزارت ملت ته د دولت د حساب ورکولو په پروګرام کې ویلي، لویدیځ هېوادونو د رسمیت پېژندلو لپاره کوم ځانګړي شرایط نه دي وړاندې کړي؛ خو هغوی د رسمیت پېژندنه د فشار په توګه کاروي.
د طالبانو د بهرنیو چارو سرپرست وزیر امیرخان متقي د سه شنبې په ورځ (د زمري ۳۱مه) ملت ته د دولت د حساب ورکولو په پروګرام کې وویل:« د ټولګډونه حکومت رامنځته کول، بشري حقونه او امنیتي مسایل د نړۍوالو له لوري یوه پلمه ده.»
نور ولولئ: چین څه غواړي؟ هواوې شرکت افغانستان کې د داعش د څار لپاره کمرې نسبوي
متقي د خپلو خبرو په دوام وايي: «د افغانستان سفارتونه په نوورو هېوادونو کې فعالیتونه کوي او د نورو هېوادونو سفارتونه په افغانستان کې هم خلاص دي، دا خپله د رسمیت پېژندلو په معنا ده او هغه هېوادونه چې سفارتونه يې په افغانستان کې خلاص دي افغانستان یی په رسمیت پېژندلی دی.»
افغانستان تر اوسه په رسمیت نه دی پېژندل شوی
متقي پر داسي مهال د رسمیت پېژندلو ادعا کوي، چې تر دې مهاله هېڅ یوه هېواد په ښکاره ډول طالبان په رسمیت نه دي پېژندلي.
همدرانګه متقي د خپلو خبرو پر دوام وویل:« د سیمې او نړۍ له هېوادونو سره مو ښې اړیکې جوړې کړې دي.» نوموړی امریکا ته په شاره وايي، له امریکایي لوري سره وخت پر وخت ناستې شوې او د یو بل د اندېښنو د له منځه وړلو په موخه بحثونه او خبرې اترې شوې دي.
نور ولولئ: متقي وايي، افغانستان به د ترانزیټ له پلوه د وصل مرکز وي
نوموړی خبرداری ورکوي او وايي: «اجازه نه ورکوو، چې افغانستان یو ځل بیا د نړۍ د هېوادونو ترمنځ د منفي رقابتونو په مرکز بدل شي او هڅه کوو چې افغانستان د سیمې د هېوادونو ترمنځ د سوداګرۍ د اتصال په مرکز بدل کړو.»
د طالبانو د بهرنیو چارو وزارت چارواکي وايي توانیدلي، چې په ډېری هېوادونو کې د افغانستان سفارتونه او استازولۍ د اقتصادي دریځ او افغاني محصولاتو ته د بازار موندنې په غوره مرکزونو بدلې کړي.
د ګاوڼدیو هېوادونو سره اړیکې
دوی وايي، د تېرو کلونو خلاف د ګاونډیو هېوادونو سره د ښو اړیکو په پایله کې د افغانستان د صادراتو په ځانګړي ډول د تازه میوو او کرنیزو محصولاتو په وړاندې خنډ نه دی رامنځته شوی او دغه توکي پر خپل وخت نړۍ والو مارکیټونو ته رسیدلي دي.
د دغه وزارت چارواکو ملت ته د حساب ورکولو پروګرام کې د معلوماتو وړاندې کولو په دوام ویلي، پر داسې یوې تګلارې کار کوي چې له مخې به یې د افغان کډوالو د ستونزو د حل لپاره د سیمې هېوادونو سره د یوې ګډې کمیټې په چوکاټ کې ګډ کار وکړي.
