ډبیلو ایچ او خبر ورکړی چې په افغانستان کې د شري ناروغي پېښې زیاته شوې چې ۲۹ کسان یې مړه کړي دي
په افغانستان کې په داسې حال کې په خلکو کې د شري ناروغي خپرېږي چې د طالبانو په بیا واکمنېدو سره خلک بې روګاره شوي او ګڼې کورنۍ خپلې لومړنۍ اړتیاوې نه شي پوره کولی.
د هېواد په ځینو ولایتونو کې د شري پر ناروغۍ د اخته کسانو تخشیص شوی او ځینې شکمنې پېښې هم ثبت شوي دي.
د روغتیا نړیوال سازمان شمېرې ښيي چې د روان ۲۰۲۴ کال په لومړیو دوو میاشتو کې د دې ناروغۍ ۷۱۷۹ شکمنې پېښې ثبت شوي چې له امله یې د ۲۹ تنو د مړینې خبر هم ورکړل شوی دی.
د شري ناروغي په کومو ولایتونو کې خپره ده؟
“ډبلیوایچاو” پرون خپل نوي راپور کې لیکلي، یوازې تېره اوونۍ د شري ۱۱۹۰ شکمنې پېښې ثبت شوي او د دې ناروغۍ له امله ۵ تنه مړه شوي.
د دې راپور پر بنسټ، له دې ۵ تنو یې ۳ په هلمند، ۲ په کندهار او ۱ په سمنګان کې دى چې ۲ یې ښځې او پاتې ۳ یې له پنځو کلونو کمعمره ماشومان دي.
نور ولولئ: افغانستان کې د رواني ناروغانو د ډېرېدو په اړه اندېښنې
نور ولولئ: افغانستان کې د نس ناستی ناروغي په ډېرېدو ده.
نور ولولئ: په افغانستان کې د ماشومانو شري ناروغۍ مخ په زیاتیدو ده
د روغتیا نړیوال سازمان راپور ښيي چې د فبروري میاشتې په درېیمه اوونۍ کې بیا د شري ناروغۍ ۱۱۱۸ شکمنې پېښې ثبت وې او د دې ناروغۍ له امله د ۶ تنو د مړینې راپور ورکړل شوی و، داسې مهال چې تېر کال تر همدې نېټې دا پېښې یوازې ۱۵۷۴ ښودل شوې وې.
پر دې ناروغي ښځې او کم عمره ماشومان اخته دي
“ډبلیوایچاو” زیاتوي، د روان میلادي په لومړیو دوو میاشتو د شري شکمنو پېښو کې ۸۰،۵ سلنه یې له پنځه کلونو کم عمره ماشومان او پاتې یې ښځې دي.
دا راپور داسې مهال خپرېږي چې د ۲۰۲۳ کال په وروستیو کې د بشري حقونو څار سازمان په یوه راپور کې وویل، د افغانستان روغتیايي سکتور سره د بهرنیو مرستو کمېدو او په نجونو او ښځو د طالبانو جدي محدودیتونو، د میلیونونو افغانانو روغتیا له خطر سره مخ کړې ده.
هاخوا بیا د طالبانو روغتیا وزارت ډاډ ورکړی چې په افغانستان کې یې روغتیايي خدمتونه ګړندي کړي او پر معیاري کېدو یې هم کار روان دی.
بلخوا راپورونه وايي چې د طالبانو تر کنټرول لاندې روغتیايي سکتور له ګڼو ننګونو سره مخامخ دي. په دغه راپورونو کې راځي چې زیات شمېر روغتونونه د ښځینه ډاکټرانو او درملو له کمښت سره مخامخ دي.
