د روسیې سفیر وايي، پر طالبانو د روسیې د لګېدلو بندیزونو د لرې کولو په اړه خبرې روانې دي
روسیه په ملګرو ملتونو او نړیوالو بنسټونو کې د طالبانو ښکاره ملاتړ کوي. دغه هېواد هڅه کوي چې پر طالبانو لګول شوي بندیزونه لرې او دارنګه یې د ترهګرو له لېست وباسي.
په ملګرو ملتونو کې د روسیې سفیر واسیلي نیبنزیا د دوشنبې په ورځ پر طالبانو د روسیې د بندیزونو لرې کېدو احتمال ته اشاره وکړه.
هغه وویل که څه هم د بندیزونو له نوملړه د طالبانو د ایستلو لپاره کره وخت نشته، «خو په دې اړه مې خبرې اوریدلې دي.»
طالبان او د دوحې غونډه
د یکشنبې په ورځ د دوحې په درېیمه ناسته کې د ۲۵ هېوادونو ځانګړو استازو، د پنځو نړیوالو سازمانونو او طالب استازو ګډون کړی وو.
طالبانو په دغه ناسته کې د بندیزونو د لرې کولو، له خصوصي سکټور سره د هیوادونو د مرستو او په افغانستان کې له نشه يي توکو سره د مبارزې غوښتنې وکړې.
نور ولولئ: طالبان: “له مسکو سره ښې اړیکې لرو، چاته یې د خرابولو اجازه نه ورکوو”
نور ولولئ: طالبان: “له مسکو سره ښې اړیکې لرو، چاته یې د خرابولو اجازه نه ورکوو”
نور ولولئ: مسکو طالبانو ته: “روسیه به د دوحې غونډه کې د طالبانو د ګډون شرطونه م.م ملتونو سره بحث کړي”
روسیې د امریکا او اروپايي ټولنې په ګډون د ډېرو هېوادونو په څېر پر طالبانو بندیزونه لګولي دي. مسکو له طالبانو سره د خپلو تودو اړیکو سره سره، دغه ډله د ترهګرو سازمانونو له نوملړ څخه نه ده ایستلې، خو ژمنه یې کړې ده چې دا کار به کوي.
پر طالبانو د لګول شویو بندیزونو لرې کول
د فرانس پریس اژانس په وینا، نیبنزیا د نورو جزیاتو له ورکولو پرته وویل: «په دې اړه چې موږ د دوی په وړاندې د روسیې د بندیزونو لرې له کولو څخه څومره لرې یو، زه نه شم کولی کره ځواب درکړم، خو ما په دې اړه خبرې اوریدلې دي.»
نوموړي د جګپوړو روسي چارواکو هغه څرګندونې تکرار کړې، چې ګواکې طالبان په افغانستان کې اصلي ځواک دی او د دغه هېواد واک یې په لاس کې دي.
د روسیې د بهرنیو چارو وزارت د وري میاشتې په لومړیو کې د ټاس دولتي خبري اژانس ته ویلي و چې د روسیې د ترهګرو سازمانونو له نوملړه د طالبانو د ایستلو په اړه غور کوي.
کله چې مسکو پر طالبانو د لګول شویو بندیزونو د لرې کولو خبره راپورته کړه، نو امریکا د روسیې دغه اقدام ته غبرګون وښود، خو روسیه وايي، طالبان به ژر د ترهګرو له تور لېست لرې کړي او دغه بندیزونه به پای ته ورسېږي.
