پي ټي اېم وايي د بلوچستان یو عدالت د علي وزیر د ضمانت په اړه پرېکړه محفوظه کړې ده
پښتون ژغورنې غورځنګ (پي ټي اېم) وايي چې د بلوچستان د حب ضلعې یو عدالت یې د مخکښ او د پاکستان د قامۍ اسمبلۍ د پخواني غړي علي وزیر د ضمانت په اړه فیصله محفوظه کړې ده.
د غورځنګ غړي هدایت الله پشتین وویل چې عدالت د ډېسېمبر پر څلورمه د وزیر د قضیې اورېدنه وکړه او ټاکل شوې چې د ضمانت په اړه خپله پرېکړه د ډېسېمبر پر پینځمه واوروي.
د وزیر وکیلې منیزې کاکړ د ډېسېمبر پر درېیمه رسنیو ته ویلي ول چې د علي وزير پر ضد هغه مقدمه د ۲۰۲۲ز کال په اکتوبر کې پر داسې وخت درج شوې وه چې هغه د کراچۍ په زندان کې بندي وو.
د حب عدالت ته ثبوتونه
هغه وايي، د حب عدالت ته یې ټول هغه ثبوتونه وړاندې کړې دي چې ورڅخه ثابتېږي چې وزیر هغه مهال په زندان کې وو.
پولیسو په هغه قضیه کې پر وزیر او د پي ټي اېم پر ۱۱ غړو په حب کې د غورځنګ غونډې پر مهال د ریاستي ادارو پر ضد د ویناګانو تور پورې کړی دی چې هغوی یې ردوي.
نور ولولئ: عوامي نشنل ګوند: د بنو پر لاریون د پاکستاني پوځ برید له ترهګرۍ سره همکاري ده
نور ولولئ: پاکستان کې د ‘پي ټي ایم’ لسګونو غړو نیونې غبرګونونه راپارولي
دا په داسې حال کې ده چې د ډېسېمبر پر درېیمه د بلوچستان د حب یو عدالت علي وزیر د قضیې اورېدنه وکړه او هغه یې د هغې ضلعې د ساحلي سیمې ګډاني زندان ته ولېږداوه.
د علي وزیر وکیله وايي چې عدالت نوموړی د ۱۴ورځنیو پلټنو لپاره پولیسو ته سپارلی وو چې هغه موده د ډېسېمبر پر درېیمه پوره شو.
په بېلابېلو جېلونو کې د عالي وزیر زنداني کېدل
د پي ټي اېم غړی هدایت الله پشتین وايي چې د ۲۰۲۲ز کال د اکتوبر په قضیه کې د غورځنګ ټول ملګري وار له مخه خوشې شوي دي.
علي وزير چې د روان کال د اګست په درېیمه د اسلاماباد پولیسو نیولی وو، تر دې دمه یې په بېلابېلو مقدمو کې د اسلام اباد او پنجاب په مختلفو جېلونو کې بند تېر کړی او د نومبر په ۱۶مه د پنجاب بکر سيمې پوليسو د بلوچستان پوليسو ته وسپاره.
پښتون ژغورنې غورځنګ پر خپلو غړو او پلویانو لګېدلي تورونه ردوي او وايي چې د هغو مقدمو هدف د غورځنګ د فعالیتونو مخه ډب کول دي.
په کراچۍ کې د پي ټي اېم یو مشر نورالله ترین د ډېسېمبر پر درېیمه مشال راډیو ته وویل، حکومتي فشار یې د مبارزې مخه نه شي نیولی. هغه زیاته کړه چې پي ټی اېم به د پښتنو د حقونو د ترلاسه کولو لپاره خپلې سوله ییزې مبارزې ته ادامه ورکوي.
پي ټي اېم وايي چې ټولې هلې ځلې یې د پاکستان له ایین او قانون سره سمې دي.
پښتون ژغورنې غورځنګ وخت په وخت د خپلو نیول شویو ملګرو د خوشې کولو لپاره د خیبر پښتونخوا او بلوچستان په ګډون د پاکستان په بېلابېلو برخو کې مظاهرې او احتجاجي لاریونونه هم کړې دي.
