اوچا وايي، په ۲۰۲۵ کال کې به له ۲۲ میلیونه ډېر افغانان بشري مرستو ته اړتیا ولري
په افغانستان کې د طالبانو له واک ته رسېدو سره سم په دغه هېواد کې د فقر، بې وزلۍ او بې روزګارۍ رېښې هم په چټکۍ سره غځیږي او ورځ تر بلې په ټولنه کې فقر وده کوي.
تازه، د ملګرو ملتونو د بشري چارو د همغږۍ دفتر یا اوچا وايي چې د ۲۰۲۵ کال پرمهال به په افغانستان کې ۲۲.۹ میلیونه کسان بشرپاله مرستو ته اړتیا ولري.
د طالبانو لخوا د محدودیتونو سره د ښځو مخامخېدل
نوموړي دفتر چهارشنبه د لیندۍ پر ۲۸مه، په یو راپور کې ویلي چې میلیونونه افغانان په ځانګړې توګه ښځې د طالبانو له محدودیتونو سره مخ دي.
دغه دفتر وايي، زیات شمېر داسې ښځې شته چې د کورنۍ سرپرستې وې، خو له بې کاره کېدو سره یې کورنۍ هم د فقر تر سرحده رسېدلي ده.
د دغه دفتر په وینا، دې محدودیتونو د افغانانو په ځانګړې توګه د اقلیتونو خوندیتوب له ګواښ سره مخ کړی دی.
پر دې سربېره، په هېواد کې د بې روزګارۍ کچه هم په چټکۍ سره وده کوي او مخ پر وړاندې ځي.
نور ولولئ: اوچا د کاپ ۲۹ غونډې ګډونوالو ته؛ افغانستان له پامه مه غورځوئ
نور ولولئ: اوچا: له افغانانو سره په ۳ کلونو کې شاوخوا ۷ میلیارده ډالره مرسته شوې
د راپور پر بنسټ، له ۲۲.۹ میلیونو وګړو څخه ۲۱ میلیونه یې روغتیاپالنې او د څښاک پاکو اوبو ته لاسرسی نه لري.
همداراز، ۱۴.۸ میلیونه نور خلک د خوړو توکو له شدیدې ناامنۍ سره مخ دي او ۷.۸ میلیونه ښځې او ماشومان بېړنیو خوړو توکو ته اړتیا لري.
په افغانستان کې د وچکالۍ ناورین
اوچا خبرداری ورکړی چې د وچکالۍ ناورین به هم د ۲۰۲۵ کال په لومړیو کې افغانستان له ګواښ سره مخ کړي.
یاد بنسټ زیاته کړې چې د ۲۰۲۵ کال لپاره بشرپاله سازمانونه کولای شي د ۲۲.۹ میلیونه افغانانو له ډلې څخه یوازې ۱۶ میلیونه کسانو ته د مرستې پوښښ برابر کړي.
دا په داسې حال کې ده چې اوچا له دې مخکې ویلي و چې د ۲۰۲۴ کال پرمهال په افغانستان کې ۲۳.۷ میلیونه کسان مرستو ته اړتیا لري او دا سازمان کولای شي یوازې ۱۷ میلیونه کسانو ته مرستې برابرې کړي.
د يادونې ده چې پر افغانستان د طالبانو د واکمنېدو له درېیو ډېر کلونه تېر شول، خو هېوادوال ورځ تر بلې بېوزلي کېږي.
بل لور ته پر طالبانو نیوکه کېږي چې د خلکو ته د کار په زمینې برابرولو کې پاټې راغلي دي.
