له سیمې سرچینې وايي، په دغه بریدونو کې د خلکو کورونه په نښه شوي چې د وژل شوو شمېر ۱۸ ته ورسېده
د پکتيکا ځايي سرچينې وايي چې د دغه ولايت په برمل ولسوالۍ کې د پاکستاني پوځ د هوايي بریدونو په ترڅ کې د وژل شویو ملکيانو شمېر ۱۸ ته رسېدلی دی.
په خوست ولایت کې د برید سیمې ته د طالبانو لخوا څوک نه پرېښودل کېږي او د هغه ځای له اوسېدونکو سره هم اړیکه نه ده ټینګه شوې.
سرچينو چهارشنبه د مرغومې پر ۵مه، رسنیو ته منلې چې د دغو بریدونو ډېرى قربانيان ښځې او ماشومان دي.
د سرچينو په وینا، په دغو بريدونو کې استوګنیزې ودانۍ بشپړې له منځه تللې دي.
د مخابراتي شبکو پرې کېدل
د سرچينو د معلوماتو پر بنسټ، له بريدونو مخکې په پکتيکا کې مخابراتي شبکې هم پرې شوې وې.
اوس هم په سیمه کې زموږ همکاران وايي، د برید سیمې ته نږدې مخابراتي شبکې سم کار نه کوي.
د پاکستان د بریدونو پر وړاندې د طالبانو تر واک لاندې دفاع وزارت سخت غبرګون ښوولی او ویلي یې دي چې دغه برید به بې ځوابه پاتې نه شي.
پر افغان خاوره د تېرې شپې برید
د پاکستان الوتکو د پکتیکا د برمل ولسوالۍ په مرغه، لمن او پیتاوګي سیمو بمباري کړې ده. په بمباري کې د اوښتې مرګ ژوبلې په اړه تر اوسه کره معلومات نه دي ور کړل شوي. دا بمبار کابل ته په افغان چارو کې د پاکستاني استازي له تګ سره هممهاله دی.
نور ولولئ: متقي: له پاکستان سره ښې اړیکې غواړو
نور ولولئ: پاکستان کې د ناامنۍ اوج؛ تازه د پولیسو پر یوه مرکز برید شوی
د سیمې اوسېدونکي وايي، لومړۍ جنګي الوتکې پر میرعلي او تپي سیمه الوتنې پیل کړې، وروسته یې افغانستان ته مخه کړه او هلته یې بمونه وغورځول.
په پکتیکا کې یوې سرچینې وویل چې دغه هوايي بریدونه د برمل ولسوالۍ په لمن، مرغه او ولې واست سیمو کې شوي دي. سرچینه وايي، چې لومړی دوه بې پیلوټه الوتکې راغلې او وروسته جیټ الوتکو پر مختلفو سیمو بمونه وغورځول. سرچینه وايي، چې دوه بمونه په سرخوړي سیمه کې اچول شوي دي.
پر دې سربېره، د افغان سولې لپاره د امریکا پخواني ځانګړي استازي د پاکستان د هوايي بریدونو رپوټونو ته په اشاره لیکلي، چې که دا بریدونه ریښتیا وي، طالبان به ځواب ور کوي، خو د جګړې په ځای دواړه هېوادونه داسې هوکړې ته اړتیا لري چې یو هم د بل د امنیت ګواښلو لپاره ترهګرۍ ته اجازه ور نه کړي او په همدغه هوکړه ودرېږي.
