د هند غوره لیګ سیالیو کې د راشد خان جادوګره لوبه د ګوجرات ټایټانز لوبډلې ته ستره بریا ور په برخه کړه او راجستان رایلز ته یې د ۷۷ منډو په لوی توپیر ماتې ورکړه.
راشد خان د راجستان توپوهنه له ستونزو سره مخ کړه
دا د روان پړاو په سیالیو کې د منډو له پلوه د ګوجرات ټایټانز تر ټولو ستره بریا بلل کېږي.
راجستان رایلز د پچې تر ګټلو وروسته لومړی د توپ اچونې پرېکړه وکړه، خو ګوجرات ټایټانز د شلو اورونو په پای کې د ۴ لوبغاړو په سوځېدو ۲۲۹ منډې جوړې کړې.
د لوبډلې لپاره لوبډلمشر شوبمن ګېل ځلېدونکې لوبه وکړه او په ۴۴ توپونو یې ۸۴ منډې جوړې کړې.
د راشد خان جادوګره لوبه د بریا اصلي لامل شوه
راجستان رایلز د توپوهنې پیل چټک وکړ او په لومړیو دوو اورونو کې یې ۳۸ منډې جوړې کړې، خو وروسته د راشد خان جادوګره لوبه د سیالې لوبډلې د توپوهنې لړۍ ګډه وډه کړه.
راشد خان په خپلو څلورو اورونو کې ۴ مهم لوبغاړي وسوځول او یوازې ۳۳ منډې یې ورکړې. نوموړی د همدې غوره توپ اچونې له امله د لوبې د غوره لوبغاړي جایزې هم ترلاسه کړه.
د دې بریا وروسته ګوجرات ټایټانز د جدول دوهم مقام ته پورته شوه، او راشد خان هم د روان آیپياېل د ډېرو ویکټ اخیستونکو په نوملړ کې شپږم ځای خپل کړ.
افغان ستوري راشد خان تر دې دمه په ۱۱ سیالیو کې ۱۵ ویکټونه اخیستي دي، په داسې حال کې چې د ویکټ اخیستونکو په نوملړ کې تر ټولو مخکې کګیسو ربادا دی، چې په ۱۱ لوبو کې یې ۱۸ ویکټونه ترلاسه کړي دي.
