د افغانستان د فوټبال فدراسیون د مالدیپ په کوربهتوب د ترسره کېدونکو څلور هېوادیزو سیالیو لپاره د ملي لوبډلې وروستی نوملړ اعلان کړی دی.
ټاکل شوې چې په دغو سیالیو کې د افغانستان، پاکستان، مالدیپ او بنګلهدېش د ملي لوبډلې برخه واخلي او د راتلونکو نړیوالو او اسیايي سیالیو لپاره خپل چمتووالی وازمويي.
د فوټبال ملي لوبډله کې تجربهکار او ځوان لوبغاړي شامل دي
په اعلان شوې لوبډله کې یو شمېر تجربهکار افغان لوبغاړي لکه رحمت اکبري، مازیار کوهیار، جمشېد اڅکزی او ساحل سروري شامل دي.
همداراز، د فوټبال فدراسیون ځینې ځوان او بهر مېشتي افغان لوبغاړي هم لوبډلې ته را بللي، څو د تجربې او نوي استعداد ترمنځ مناسب توازن رامنځته شي.
د فدراسیون مسوولین وایي، د لوبغاړو ټاکنه د وروستیو تمریناتي کمپونو او تخنیکي ارزونو پر بنسټ شوې ده.
افغانستان به له پاکستان، مالدیپ او بنګلهدېش سره لوبې وکړي
د معلوماتو له مخې، د فوټبال دغه څلور اړخیز ټورنمنټ به د جون میاشتې په لومړیو ورځو کې پیل شي او شاوخوا لس ورځې به دوام وکړي.
افغانستان به په دې سیالیو کې د پاکستان، کوربه مالدیپ او بنګلهدېش پر وړاندې میدان ته ښکته شي.
د فوټبال فدراسیون ویلي، دا سیالۍ د ملي لوبډلې لپاره مهم فرصت ګڼل کېږي، ځکه روزونکی پلاوی غواړي د لوبغاړو فزیکي وضعیت، تخنیکي همغږي او تاکتیکي ترکیبونه له نږدې وازمويي.
شنونکي باور لري چې دا ټورنمنټ کولی شي د افغانستان د فوټبال ملي لوبډلې د راتلونکو رسمي سیالیو لپاره د لا ښه چمتووالي زمینه برابره کړي.
