د امریکا د کالیفورنیا پوهنتون د سان ډیاګو څانګې ساینسپوهانو یوه حیرانوونکې وسیله جوړه کړې چې د هوا د رطوبت له بدلون سره سم پټ انځورونه ښکاره کوي او رنګ بدلوي.
څېړونکي وایي، دا نوې ټکنالوژي په راتلونکي کې د جعلي توکو د مخنیوي، د معلوماتو د خوندي ساتنې، هوښیار نندارتونونو او چاپېریالي حسکو (سینسرونو) په برخه کې کارېدلی شي.
حیرانوونکې وسیله څنګه کار کوي؟
دا کوچنۍ وسیله، چې د پوستټاپې په اندازه ده، د رطوبت د کچې له بدلون سره بېلابېل انځورونه ښيي.
د وچې هوا پر مهال یو انځور څرګند وي، خو کله چې رطوبت لوړ شي، بل پټ انځور راڅرګندېږي او لومړنی انځور پټوي.
د څېړونکو په وینا، یوازې د انسان ساه هم کولای شي د دې وسیلې دننه بدلون رامنځته کړي او پټ انځور ښکاره کړي.
د وسیلې دا بدلون په څو شېبو کې ترسره کېږي او د اوږدې مودې لپاره څو ځله تکرارېدلی شي، پرته له دې چې موادو ته یې زیان ورسېږي.
حیرانوونکې وسیله او د امنیتي او سوداګریزو برخو لپاره نوې حللاره
د څېړنې یو مخکښ غړی اسد نعمان وایي، دا ټکنالوژي کولی شي د امنیتي کوډونو او پټو معلوماتو د ساتنې لپاره نوې لارې پرانیزي.
د بېلګې په توګه، د بانک کارت، مهم سند یا د یوه محصول پر بستهبندۍ داسې پټ کوډ ځای پر ځای کېدای شي چې یوازې د رطوبت یا د انسان د ساه په وسیله ښکاره شي.
څېړونکي باور لري چې دا ځانګړنه به د جعلکارۍ د مخنیوي او د حساسو معلوماتو د خوندي ساتلو لپاره ګټوره تمامه شي.
د رطوبت له بدلون سره رنګ هم بدلوي
د دې حیرانوونکې وسیلې بله ځانګړنه دا ده چې د رطوبت د زیاتېدو او کمېدو پر مهال رنګونه هم بدلوي.
ساینسپوهان وایي، د وسیلې په جوړښت کې د دوو طبقو ترمنځ واټن د رطوبت له اغېز سره بدلېږي، چې له امله یې د رڼا انعکاس بدلون مومي او بېلابېل رنګونه رامنځته کېږي. حیرانوونکې وسیله
د څېړنې پایلې ښيي چې د انځورونو او رنګونو بدلون په نږدې ۳۰۰ میلیثانیو کې ترسره کېږي، چې دا چټکتیا یې د عملي کارونې امکانات لا زیاتوي.
څېړنیز ټیم اوس پر داسې نسخو کار کوي چې د رطوبت پر ځای د برېښنا له لارې هم کنټرولېدای شي، څو د دې نوې ټکنالوژۍ د کارونې ساحه لا پراخه شي.
