د خوړو نړیوال پروګرام (WFP) وایي، افغانستان ته د مرستو رسولو ستونزه د سیمې د بېثباتۍ، د سرحدونو د بندېدو او د ترانسپورتي لارو د محدودیتونو له امله لا پېچلې شوې ده. د دې ادارې په وینا، په داسې حال کې چې سلګونه زره افغانان لا هم د خوړو له کمښت او لوږې سره مخ دي، بشري مرستې د پخوا په پرتله له ډېرو خنډونو وروسته اړمنو خلکو ته رسېږي.
د WFP په وروستي راپور کې راغلي چې د افغانستان لپاره د خوراکي مرستو د لېږد دودیزې لارې څو ځله بدلې شوې دي. د راپور له مخې، سیمهییزو محدودیتونو، لوژستیکي ستونزو او په ځینو ترانزیټي لارو کې رامنځته شویو خنډونو د مرستو د رسولو بهیر اغېزمن کړی دی. افغانستان ته د مرستو رسولو ستونزه
سرحدي محدودیتونو د مرستو لارې اوږدې کړې
د خوړو نړیوال پروګرام ویلي، د خوراکي مرستو یوه جوپه چې د سمندر له لارې پاکستان ته لېږدول شوې وه، د سرحدي ستونزو له امله ونه توانېده خپل اصلي مسیر تعقیب کړي. وروسته دغه مرستې د دوبۍ، منځني ختیځ، قفقاز او منځنۍ اسیا له لارې افغانستان ته انتقال شوې.
د ادارې په وینا، د بدیلې لارې کارولو د مرستو پر مسیر نږدې ۸ زره کیلومتره واټن زیات کړی او د لېږد بهیر یې اوږد او لګښت یې لوړ کړی دی.
افغانستان ته د مرستو رسولو ستونزه د زیانمنو کورنیو اندېښنې زیاتوي
د راپور له مخې، مرستندوی کاروانونه د افغانستان تر رسېدو مخکې له څو سرحدي دروازو، امنیتي پلټنو او ګمرکي پروسو تېر شوي چې دې چارې د مرستو په رسولو کې د پام وړ ځنډونه رامنځته کړي دي.
WFP خبرداری ورکړی چې د افغانستان په ډېرو سیمو کې د ښوونیزو تغذیوي پروګرامونو له لارې وېشل کېدونکي مغذي بسکټونه د ځینو ماشومانو لپاره د ورځې یوازینی خوراک ګڼل کېږي.
بشري بنسټونه وایي، د ماشومانو او امیندوارو ښځو ترمنځ د خوارځواکۍ د زیاتېدو اندېښنې لا هم پر ځای دي. د دوی په باور، د افغانانو د ژوند د ژغورلو او د بشري ناورین د مخنیوي لپاره نړیوالو مرستو ته دوام ورکول اړین دي.
د خوړو نړیوال پروګرام ټینګار کړی چې د افغانستان ته د مرستو رسولو ستونزه یوازې د لوژستیکي خنډونو موضوع نه ده، بلکې د میلیونونو اړمنو افغانانو د ژوند او خوړو له خوندیتوب سره مستقیم تړاو لري.
