د بي بي سي راډیو خپرونې په افغانستان کې پر افام څپو ځنډول شوې دي. د اطلاعاتو او کلتور وزارت وايي، دا پرېکړه د دې رسنۍ د «پرلهپسې سرغړونو» له امله شوې، خو د دغو سرغړونو جزیات یې نه دي وړاندې کړي.
د اطلاعاتو او کلتور وزارت د رسنیو د څار رییس صفيالله راید ویلي، د بي بي سي راډیويي نشرات په ټول هېواد کې درول شوي دي.
د وزارت ویاند خبیب غفران هم ویلي چې د اوس لپاره د دې رسنۍ د راډیويي فعالیتونو د ځنډولو پرېکړه شوې ده.
د بي بي سي راډیو خپرونې؛ د بندېدو دلیل څه دی؟
د اطلاعاتو او کلتور وزارت د خپرونو د ځنډولو لامل «مکررې سرغړونې» بللې دي.
خو وزارت تر اوسه په عامه توګه نه دي روښانه کړي چې بي بي سي کومې مشخصې سرغړونې کړې او د خپرونو د بېرته فعالېدو لپاره باید کوم شرایط پوره کړي.
رویټرز هم راپور ورکړی چې په افغانستان کې د بي بي سي راډیويي نشرات ځنډول شوي دي.
بي بي سي د خپلو خپرونو بندېدل تایید کړي او ویلي یې دي چې د موضوع د حل لپاره له افغان چارواکو سره په اړیکه کې ده.
بي بي سي د نشراتو د بېرته پیل هڅه کوي
د بي بي سي یوه ویاند ویلي چې رسنۍ د خپلو راډیويي خدماتو د بېرته فعالولو لپاره له چارواکو سره کار کوي.
د رسنۍ په وینا، په افغانستان کې میلیونونه کسان د خبرونو او معلوماتو د ترلاسه کولو لپاره د بي بي سي له خدمتونو استفاده کوي.
تر اوسه څرګنده نه ده چې د بي بي سي راډیو خپرونې به تر کومې نېټې بندې وي او ایا د اطلاعاتو او کلتور وزارت د بندیز د لرې کولو لپاره کوم مشخص شرایط ټاکلي که نه. د بي بي سي راډیو خپرونې
د موجودو معلوماتو له مخې، اوسنۍ پرېکړه د راډیويي نشراتو او افام څپو په اړه ده. د بي بي سي د نورو رسنیزو خدمتونو د بشپړ بندېدو په اړه معلومات نه دي ورکړل شوي.
