افغانستان کې د لوږې زیاتوالی؛ ملګري ملتونه اټکل کوي چې د ۲۰۲۶ او ۲۰۲۷ کلونو په ژمي کې به ۱۹.۲ میلیونه افغانان د خوړو له سخت کمښت سره مخ شي.
د ملګرو ملتونو د خوړو او کرنې سازمان (FAO) او د خوړو نړیوال پروګرام (WFP) خبرداری ورکړی چې په راتلونکي ژمي کې به شاوخوا ۱۹.۲ میلیونه افغانان د خوړو له سخت کمښت سره مخ شي.
د دغو ادارو د اټکل له مخې، افغانستان کې د لوږې زیاتوالی ښايي د ۲۰۲۶ کال له نومبر څخه د ۲۰۲۷ کال تر اپرېل پورې د هېواد نږدې ۳۸ سلنه وګړي اغېزمن کړي.
دا شمېر د تېر کال د همدې مودې له ۱۷.۴ میلیونه کسانو څخه ۱.۸ میلیونه زیات دی.
افغانستان کې د لوږې زیاتوالی؛ پنځه میلیونه کسان له بېړني حالت سره مخ دي
د ملګرو ملتونو د اټکل له مخې، نږدې پنځه میلیونه افغانان به د خوراکي ناامنۍ له بېړني حالت سره مخ شي.
دا شمېر د ۲۰۲۶ کال د اپرېل او سپټمبر ترمنځ د اټکل شوې کچې شاوخوا دوه برابره دی.
په راپور کې بدخشان، بادغیس، دایکنډي، غور، سمنګان، سرپل او د غزني کلیوالي سیمې د هغو ځایونو په توګه یادې شوې چې د خوړو د کمښت سخت وضعیت پکې اټکل شوی دی.
په ۲۰۲۷ کال کې د خوارځواکۍ د زیاتېدو اندېښنه
د ملګرو ملتونو د اټکل له مخې، په ۲۰۲۷ کال کې به د خوارځواکۍ له ستونزې سره د مخ کسانو شمېر نږدې څلور میلیونو ته ورسېږي.
اټکل کېږي چې د دغو کسانو شاوخوا څلورمه برخه به له شدیدې او ژوند ګواښوونکې خوارځواکۍ سره مخ وي.
ښځې او ماشومان د دې وضعیت له تر ټولو زیانمنوونکو ډلو څخه بلل شوي دي.
د کډوالو راستنېدو پر کورنیو سرچینو فشار زیات کړی
د راپور له مخې، له ایران او پاکستان څخه د څه باندې ۱.۲ میلیونه افغانانو راستنېدو پر هغو ټولنو فشار زیات کړی چې له وړاندې د مرستو او لومړنیو خدمتونو له کمښت سره مخ دي. افغانستان کې د لوږې زیاتوالی افغانستان کې د لوږې زیاتوالی
د سوداګریزو لارو ګډوډېدو او د لومړنیو توکو د بیو لوړېدو هم د بېوزلو کورنیو د پېرلو توان کم کړی دی.
ښه کرنیز حاصلات ولې د لوږې مخه نه نیسي؟
که څه هم په ۲۰۲۶ کال کې مناسب بارانونه د کرنیزو حاصلاتو په ښه کېدو کې مرسته کړې، خو ملګري ملتونه وايي چې ښه حاصلات په یوازې ځان د لوږې ستونزه نه شي حل کولی.
د دوی په وینا، بېکاري او د عاید نشتوالی د دې لامل کېږي چې کورنۍ په بازارونو کې د خوراکي توکو له موجودیت سره سره د هغو د پېرلو وس ونه لري.
ملګري ملتونه د بېړنیو مرستو غوښتنه کوي
د افغانستان کې د لوږې زیاتوالی د مخنیوي لپاره د خوړو او کرنې سازمان او د خوړو نړیوال پروګرام د خوراکي مرستو، کرنیز ملاتړ او د خوارځواکۍ د درملنې لپاره د مالي سرچینو د برابرولو غوښتنه کړې ده. افغانستان کې د لوږې زیاتوالی
په افغانستان کې د خوړو او کرنې سازمان استازي ریچارډ ټرینچارډ ویلي، پر وخت مرستې او کرنیز ملاتړ کولی شي د خوراکي ناامنۍ په کمولو کې مرسته وکړي.
د خوړو نړیوال پروګرام مشر جان ایلیف هم خبرداری ورکړی چې د خلکو اړتیاوې زیاتېږي، خو د مرستو مالي سرچینې کمېږي.
تر ژمي مخکې د مرستو رسولو اړتیا
د ملګرو ملتونو په وینا، مرستې باید د ژمي تر سختېدو مخکې اړمنو کورنیو ته ورسېږي.
دوی خبرداری ورکړی چې د ژمي په رارسېدو سره لرې پرتو سیمو ته لاسرسی ستونزمنېږي او د کرنیزو کارونو فرصتونه هم کمېږي.
مرستندویه ادارې ټینګار کوي چې د خوراکي توکو ترڅنګ د کرنې ملاتړ او د خوارځواکۍ د درملنې خدمتونه هم باید پراخ شي.
