امریکا کې افغان کډوال د احتمالي ایستلو له ګواښ سره مخ دي. افغانایوک له کانګرس سره د خبرو له لارې د هغوی د قانوني خوندیتوب غوښتنه کوي.
د افغان کډوالو د ملاتړ سازمان «افغانایوک» له امریکا څخه د یو شمېر افغانانو د احتمالي ایستلو د مخنیوي لپاره خپلې هڅې چټکې کړې دي.
دغه سازمان وايي، د امریکا د کډوالۍ د ادارې وروستیو اقداماتو د هغو افغانانو اندېښنې زیاتې کړې چې ځینو یې له امریکايي ځواکونو سره همکاري کړې ده.
د راپورونو له مخې، د یو شمېر افغانانو د پاکستان له لارې افغانستان ته د لېږد احتمال مطرح شوی، خو د دغه پلان وروستۍ پایله لا روښانه نه ده.
امریکا کې افغان کډوال او د کانګرس د ملاتړ هڅې
افغانایوک د نومبر له نهمې تر یوولسمې په واشنګټن کې د پخوانیو امریکايي پوځیانو، افغان متحدینو او د کډوالو د حقونو د فعالانو غونډې تنظیم کړې دي.
د دغو غونډو موخه د کانګرس له غړو سره خبرې او د افغانانو لپاره د قانوني خوندیتوب غوښتنه ده.
سازمان غواړي چې د لنډمهالې ساتنې وضعیت یا TPS اړوند قانوني هڅې پیاوړې شي، څو د شرایطو وړ افغانان له ایستلو خوندي پاتې شي.
د ۶۶ کانګرس غړو غوښتنه
د امریکا د کانګرس د دواړو خونو ۶۶ غړو هم د حکومت له چارواکو غوښتي چې افغانستان ته د زیانمنونکو کسانو د احتمالي ایستلو پلان ودروي.
دوی اندېښنه څرګنده کړې چې ځینې ستنېدونکي افغانان ښايي له امنیتي ګواښونو سره مخ شي.
بلخوا، د کډوالو د حقونو فعال ډاکتر محمدالله صدیقي د افغانایوک د هڅو هرکلی کړی او د افغانانو د پناه غوښتنې د دوسیو د ارزونې غوښتنه یې کړې ده.
نوموړی وايي، امریکا کې افغان کډوال د خپل قانوني وضعیت د روښانه کېدو لپاره عملي پرېکړو ته اړتیا لري.
افغانایوک ټینګار کوي چې د امریکا پخواني افغان متحدین باید له قانوني خوندیتوب پرته له دغه هېواده ونه ایستل شي.
د دغو هڅو پایله لا څرګنده نه ده او امریکا کې افغان کډوال د خپلو دوسیو په اړه د پرېکړو په تمه دي.
