د خه خوب لرلو لپاره څو اړین او اغېزناک ټکي

تاسو د خوب او راپاڅېدو وخت مو مالوم کړئ او دا هم مالوم کړئ چې څه وخت تاسو ته ډېر خوب درځي. که دا کار وکړئ ستاسو د وجود ساعت هم تنظیمېږي.

له ډېر ویده کېدو ځان وساتئ ان په رخصتۍ کې. که شپې ناوخته ویده کېږئ، د دې پر ځای چې سهار بېرته ناوخته راجګېږئ، د ورځې په اوږدو کې یو ساعت استراحت وکړئ، خو سهار پر خپل وخت راجګ شئ. که پوهېږئ چې د ورځې استراحت مو بیا د شپې خوب درخرابوي، نو ویده کېږئ مه، یوازې راحت څملئ.

تر ماښام وروسته که خوب درباندې راته، ځان ترې ساتئ، پر یو شي یا کار ځان بوخت کړئ چې خوب مو وتښتي، ځکه ویده کېدل ښه نه وي او د شپې ناوخته بېرته راویښېږئ.

 د کوټې رڼا تنظیم کړئ!

د رڼا کچه د ملاتونین په نوم هورمون کنټرولوي، د ویده کېدو او راپاڅېدو د وخت په تنظیم کې مرسته کوي. کله چې تیارې ته شئ ماغزه مو ډېر میلاتونین ترشح کوي چې خوبولی حالت دربښي.

د ورځې ځان ته لمر ورکړئ. که تر ویښېدو وروسته لمر ته کېنئ او چای وڅښئ یا سهارنۍ وخورئ، ستاسو په سم ویښېدو کې مرسته کوي. لږ کار مو په ازاده هوا کې وکړئ. تر خپلې وسې مو کورته طبیعي رڼا ورپرېږدئ.

د شپې تر ویده کېدو لږ تر لږه یو – دوه ساعته وړاندې نوري صفحې مه کاروئ. یوازې مبایل، تبلیت، کمپیوټر نه، تلویزیون او ځینې خپرونې هم ستاسو حواس ګډ وډي. د الکترونیکي کتاب یا سافټ پر ځای کاغذي کتابونه مطالعه کړئ. د خوب پر مهال مو خونه سمه تپه تیاره کړئ . ډبلې پردې کش کړئ او کوټه ښه تیاره کړئ. که د شپې د کومې اړتیا پر بنسټ له خوبه راپاڅېدئ، تېز څراغونه مه لګوئ او نرمه رڼا وکاروئ.

منظم ورزش وکړئ!

درانه ورزشونه لږ تر لږه تر خوبه درې ساعته مخکې خلاص کړئ. که بیا هم ستونزه لرئ، بیا یې هم ژر خلاص کړئ. ځانونه ریلکس یا راحته وساتئ، سپک او کششي ورزشونه وکړئ.

خوراک او څښاک ته مو پام وکړئ!

کافیین کم کړئ. ښایي حیران شئ چې د کافیین لرونکو څښاکو تر څښلو لس – دولس ساعته وروسته هم ستاسو پر خوب اغېز کولی شي. سګرټ هم خوب خرابوي. مهمه نه ده چې هماغه ساعت دې وڅکول شي یا وڅښل شي، دا دواړه شیان د ورځې په اوږدو د شپې د خوب د خرابوالي لامل کېږي. د شپې پر مهال ډېر مایعات مه څښئ، ځکه ناراموي مو.

ځان ارامه او ذهن مو تش کړئ!

موږ حتماً د ورځې څو ځلي خپل ایمېل یا انټرنټي نړۍ ګورو. دا کار سټرس راته پیدا کوي او فشار راباندې راولي. اندېښنې راته پیدا کوي او د خوب پر وخت مو فکر شلو خواوو ته تیت وي. د سټرس او اضطراب د کمولو په پار هغه تګلارې تعقیب کړئ چې له مینځه یې وړي. ریلکسېشن وکړئ او هغه داسې:

-سترګې مو پټې کړئ، ژوره ساه واخلې، دا کار پرله پسې تکرار کړئ.

د عضلاتو ارامول پیل کړئ. له ګوتو پیل، ورو ورو مو ټول عضلات راټول کړئ، بېرته خوشې کړئ، ان تر سره دا کار وکړئ.

داسې ځای وانځوروئ چې ارامه وي او سوله ییزه فضا ولري. یانې تصور کړئ چې همداسې ځای کې یاست.

د خوب لپاره ارامه مقدمه جوړه او ځینې مراسم ورته ونیسئ، لکه:

په کمه رڼا کې کتاب یا مجله ولولئ.

په تودو اوبو ولامبئ.

د قران کریم تلاوت واورئ، څوک چې وایي نه، ارامه موسیقي اورم، هغه یې خپل کار دی.

ساده کششي حرکات وکړئ.

غږیز کتابونه واورئ.

چې خوب درباندې راغی څراغ ګول کړئ.

د خوب چاپېریال مو برابر کړئ!

د خوب کوټه مو ارامه، تیاره او سړه یا یخه وساتئ. هر ډول غږونه یو څه کم کړئ. خونه مو ډېره توده یا ډېره یخه مه ساتئ. چپرکټ یا تخت مو سم اماده کړئ، که سهار راپاڅېدئ او ملا مو خوږېده یا مو اورمېږ درد کاوه، بېلابېل بالښتونه او توشکې وازمایئ. بالښت لږ ټیټ و جګ کړئ، رویجایي مو نرمه وټاکئ، توشکه مو سمه وي.

تخت مو یوازې له خاوند/ مېرمنې سره د ویده کېدو لپاره وکاروئ، مانا کله چې تخت ته ورپورته شوئ نو تلویزیون مه ګورئ، کتاب مه لولئ او نورې چارې مه کوئ، یوازې د کوروالي او ویده کېدو لپاره یې ځانګړی کړئ.

 د شپې تر ویښېدو وروسته، تښتېدلی خوب داسې راوګرځوئ!

هرومرو ځینې کسان چې له خوبه جګ شي یا نیمه شپه راویښ شي، خوب تښتي. د دې لپاره چې خوب مو یوسي، ذهن ته مو هېڅ ډول فکر مه پرېږدئ، ژوره او اوږده ساه واخلئ. ریلکسېشن مو موخه کړئ نه خوب. کله چې خوب وتښتېد، مدیتیشن پیل کړئ، عضلات مو ارامه کړئ او کرار څملئ.

ارامه او بې زحمته کار پیل کړئ: که خوب مو تر پینځه لسو دقیقو بېرته رانغی، پاڅېږئ یو کتاب راواخلئ او په کمرنګه رڼا کې یې ولولئ. تېز ګروپ مه لګوئ، مبایل او کمپیوټر مه کاروئ، ځکه که مبایل ولګوئ یا کمپیوټر ته کېنئ، وجود مو داسې فکر کوي چې ګڼې د پاڅېدو وخت راورسېد.

 که د شپې تر ناوخته خوب نه درته بیا!؟

که د شپې تر ناوخته پورې خوب نه درته، یا کله چې نیمه شپه ویښ شوئ، بېرته خوب نه وړئ او ساعت ته مو کتل، هرومرو مو ذهن کې کوم څه درګرځی چې خوب ته مو نه پرېږدي. هر شی چې ستاسو ذهن ته یې ارامتیا نه درپرېښوده، هغه واخلئ پر یوه کاغذ یې ولیکئ، په اړه یې ټوله اندېښنه او حللاره سبا ورځې ته پرېږدئ، کرار ویده شئ.

بیا مو هم خوب جوړ نه شو؟

که له دې ټولو کارو وروسته مو بیا هم دغه لاندې ستونزې درلودې، ښایي تاسو  د خوب ستونزې او اوږدې درملنې ته اړتیا لرئ:

د ورځې په اوږدو کې ستړیا او خوبولي توب.

د خوب پر وخت خُروپوف او په لوړ اواز خُرخُر کول

په سختۍ ویده کېدل یا ویده پاتې کېدل

بې کیفیته خوب

همیشني سهارني سر دردونه

د ویده کېدو یا بېرته ویښېدو پر وخت کمزوري

د خوب لیدو پر وخت ټکان خوړل یا لړزېدل

مېرمنو لپاره؛ سوځېدلو له امله لکې او داغونه دا ډول ژر لمنځه یوسئ

ډېر کله مېرمنې او نجونې په پخلنځي او د کور په چارو کې له ځینو پېښو سره مخ  کېږي، چې له ډلې يې يو هم د بدن، خصوصاً د لاسونو او مخ سوځيدل دي، چې بيا ډېر وخت ترې ځورېږي او د داغ د له منځه وړلو لپاره يې مختلف ډول کیمیاوي درمل او کریمونه کاروي.

خو نن درسره داسې يوه طريقه شريکوو، چې په وسيله يې کولای شئ د سوځېدلو وروسته چې په مخ او لاسونو کوم داغونه پاتې کېږي، په دېره آسانه او ژر له منځه يوسئ.

کله چې تاسو په پخلنځي کې ياست حتماً داسې وخت راغلی، چې ستاسو مخ يا لاسونه سوځېدلي وي، نو په ځای د دې چې د پوستکي متخصص روغتیاپال ته لاړ شئ يا کوم کريم واخلئ، نو سم د لاسه يو دانه کچالو په منځ نيم او په سوځېدلي ځای يې د پنځلس دقيقو لپاره کېږدئ.

په دې کار سره تاسو نه يوازې د پيسو سپما کړې، بلکې د خپل پوستکې پر وړاندې مو هم ښه ساتنه کړی.

دا ماسک هم د ښځينه وو او هم د نارينه وو لپاره د استفادې وړ دی، چې هم ارزانه، اسانه او ګټور دی.

خندا جسمي، ذهني او ټولینزې ګټې لري

خندا د ژوند مالګه ده. په ټولیزه توګه خندا یوه کس ته د زړه سکون او موقتي آرامتیا ور بښلای شي، خو تر هغه ځایه خندېدل ښه وي چې انسان د خدای له یاده ونه باسي او منحرف نه شي. سره له دې خندا هم روح او هم فزیک ته ګټه لري. اړیکې مو سره ټینګوي او د ژورو ملګرتیاوو لامل هم کېدای شي. کله چې موږ یو کس ووینو چې خاندي، همداسې خدایي موږ ته هم خندا راشي، دا یې لومړنی اغېز دی چې پر لیدونکي یې ښندي. د خندا په اړه یو ښکلی پښتو بیت هم درته وایم:

څوک دې ماته ووایي څرنګه شیدا شي څوک

څوک چې چاته وخاندي، ولې په خندا شي څوک

خندا تر بهرنیو اغېزو سربېره د انسان په درون او پر دننه حالت هم تاثیر کوي. خندا ځینې ګټې لري چې په دې لیکنه کې به یې راسره ولولئ.

په ټولیزه توګه خندا د روغتیا لامل کېږي:

د ټول ځان د ارامتیا لامل کېږي. تر خندا وروسته لږ تر لږه (۴۵) دقیقې د وجود ټول عضلات استراحت غوندې وي؛

د بدن دفاعي سیسټم پیاوړی کوي. د مکروب پر وړاندې مو وجود غښتلی کوي. د اضطراب هورمون تولید کموي؛

اندورفین هورمون تولیدوي چې په ټول وجود کې د ارامتیا لامل کېږي؛

 د وینو د رګونو د ښه کار کولو لامل هم کېږي چې د زړه د حملو او ناروغیو مخه ډب کوي؛

غوسه خو بالکل کنټرولوي او کموي یې. هر وخت چې کومې ستونزې سره مخ شوئ او رواني حالت یې درخراب کړ، یوازې همدومره وکړئ چې پر هغه ستونزه ملنډې ووهئ او وخاندئ. سمدستي مو اراموي او ټوله اندېښنه مو راکموي؛

عمر اوږدوي. څېړونکو په ډاګه کړې، هغه کسان چې ډېر خاندي یا هسې شوخ طبعه دي، تر بړوسو او ارامو خلکو ډېر ژوند کوي.

جسمي ګټې یې:

-د وجود دفاعي سیسټم پیاوړی کوي؛

د اضطراب هورمون کموي؛

د وجود د عضلاتو د استراحت یا دمې لامل کېږي؛

د زړه د ناروغیو مخه نیسي.

ذهني ګټې یې:

د ژوند خوند ډېروي؛

د اندېښنو کمښت لامل کېږي؛

پر اضطراب او وېرې د برلاسۍ لامل ګرځي؛

روحي یا اروایي حالت ښه کوي.

ټولنیزې ګټې یې:

له نورو خلکو سره د اړیکو ټینګوولو لاره هواروي؛

د ځان پر لور د نورو راکاږل یې بله ګټه ده؛

د تشویش، ربړو او ځینو ستونزو مخه نیسي؛

په ډلو کې د اوسېدلو ښه لاره ده.

د ذهن د ارامتیا او خندا تر مینځ اړیکه:

کله چې خاندئ نشئ کولی همغه دم غوسه یا اندېښمن هم واوسئ، نو د وېرې او غوسې مخه ډب کوي. پر ستونزو ستاسو د برلاسۍ احساس قوي کوي او داسې فکر نه کوئ چې ګېني دا ستونزې به تاسو پخپل ځان کې ډوب کړي. که هېڅ د خندا چل نه درتله، کومیډي فیلمونه او ویډیوګانې وګورئ. دا هم اړینه نه ده چې یوازې همدا کار وکړئ، د ملګرو په ډله کې اوسېدل او هغوی سره بنډار کول، هرومرو خنداوې لري. له هماغه ماشومتوبه زموږ په وجود کې فطرتاً خندا اغږل شوې. ښایي پام مو کړی وي چې ماشوم د ژوند په لومړنیو اونیو کې نرم نرم خاندي، لږ وخت وروسته یې دا خندا غږ پیدا کوي او ښه کړس کړس خاندي. ورو ورو د خندا چل ښه سم زده کوي. که مو له دیني او مذهبي پلوه په لوړ غږ خندېدل نه وي خوښ، مازې موسکا خو کولی شئ.

موسکا د خندا لپاره یوه ښه مقدمه ده. له دیني پلوه هم کومه ستونزه نه لري. او هره هغه څېره چې موسکه وي، خدایي داسې عجیبه خوږلني پکې وي او انسان ته جذابه ښکاري. هره هغه خبره یا کړنه چې ستاسو او د خندا ترمنځ واټن جوړوي، ایسته یې کړئ او بیخي یې کیسه کې مه کېږئ. ژوند خپلې هسکې ټیټې لري، خو تاسو خپل ژوند ته په هر حالت کېورموسک شئ چې هغه هم دروخاندي.

له ټولو ګټو سره د خندا بله ګټه دا ده چې سړی ځاون ساتي او پوستکی خرابېدو ته نه پرېږدي، ځکه چې له دننه انسان جوړ وي، هورمونونه سم فعالیت کوي، دفاعي سیسټم روغ وي، نو خامخا په ظاهري بڼه هم اغېز ښندي.

وېښتان په څوډوله دي

وېښتان درې ډوله دي

لانګو هغه ویښته دي چې په جنیني پړاو کې پر بدن پیدا کېږي

نازک او ګڼ وېښتان چې په ماشومتوب کې تر زېږون وروسته ټول ځان پوښي.

ترمینال ویښته چې ډبل او تېز رنګ لري. پر سر، ږیره، لاسونو، پښو او پټو ځایونو راخېژي.

بېلابېل فولیکولونه بېلابېل ویښته جوړولای شي. دا هم کېدای شي چې ویښته له یوه فولیکوله جوړ وي، خو د وخت په تېرېدا یې د هورمونونو د اغېز له امله خپله بڼه بدله کړې وي.

په ژویو کې ځینې وېښتان حسي دنده لري، خو انسانانو کې دا ډول نشته. په انسانانو کې د تایلوټریک په نامه ځینې ویښته شته چې د نس یا خېټې پر سر وي او حسي دنده هم لري. د وېښتانو د فولیکولونو شمېر په ټول ځان کې پینځه میلیونه دي. دا شمېر په ټولو انسانانو کې یو ډول وي، آن د ښځینه او نارینه وو فولیکولونه هم کم و ډېر نه دي. تر ځینو ژویو د انسانانو ویښتان ډېر دي، خو دا چې لږ برېښي د دې لپاره چې ډېری وېښته یې اوږدېږي او ډبلېږي نه.

په ټولو انسانانو کې وېښتان د فعالیت او دمې یا استراحت پړاو لري. هغه پړاو چې ویښته وده پکې کوي اناژن نومېږي. استراحت چې پکې کوي، هغې ته تلوژن وایي. د دې دواړو ترمنځ لېږدونکي پړاو ته کاتاژن وایي. اناژن د سر ویښتو کې ډېره وي. دا پړاو په ځینو کې توپیر کوي، ځکه خو د ځینو کسانو ویښته ګڼ او د ځینو رنګړي وي. کاتاژن په سر کې دوې اونۍ او تلوژن درې میاشتې نیسي. تر هغې وروسته بیاځلي اناژن پیلېږي.

په سر کې د فولیکولونو شمېر سل زره دی. یوه سلنه یې د کاتاژن پړاو کې وي، اتیا تر نوي په اناژن او لس تر شلو په تلوژن کې وي. که د اناژن مرحله زر ورځې وګڼو، نو د ورځې سل وېښتان تویېږي او پر ځای یې نور وېښتان شنه کېږي. که تر بلوغ وروسته مو د ورځې تر سلو لږ وېښتان تویېدل، عادي دي. که چېرې تر سلو یا یونیم سلو ډېر وو، ښه به وي چې د همدې برخې متخصص ته ورشئ.

د ویښتو څرنګوالی او اندازه یې تر جنیټیکي لاملونو توپیر کوي. په جاپانیانو کې ویښتان شخ شخ وي. افریقایانو کې ګڼ او توني شکله وي. موږ غوندې خلکو کې لکه افغانیان او ایرانیان بیا، هم ښوی وېښتان شته هم ګڼ او توني.

جالبه دا ده چې د مېرمنو وېښتان تر نارینه وو ډبل او په تندي کې تر هغوی وړاندې د مخ پر لوري راخېژي. تر بلوغ مخکې تر هلکانو د سر ویښته ژر وده کوي او تر بلوغ وروسته د نجونو. که د جنسیت خبره مطرح نه کړو, د وېښتانو د چټکې ودې پړاو تر پنځوسو یا اویا کلنۍ دی.

د وېښتانو پر وده هورمونونه خپل اغېز ښندي. سټروژن د ودې د چټکوالی کموي او ټایرویېد یې وده چټکوي. د ویښتو توږل او د سر ګنجی کول د ودې د تېزوالي لامل نه کېږي. په انسان رنګي دانې میلانین دي چې میلانوسیت یې تولیدوي او دا د ویښتو په بېخ یانې پیاز کې دي. د رنګ څرنګوالی د میلانین په جوړښت پورې اړه لري. میلانین دوه ډوله دی. هغه چې تور او قهوه یي رنګ جوړوي یومیلانین دی او هغه چې د ژېړ یا سره رنګ ترمنځ رنګ جوړوي فیومیلانین نومېږي. که میلانین ونه لري، هغه وېښتان سپین ښکاري. د وجود ټولو ویښتانو کې د بڼو ویښته تېز رنګ لري.

د یوه کس د وښتانو رنګ ټاکل په جنیټیک پورې اړه لري. ځینې هورمونونه هم اغېز لري، لکه استروژن، پروژسټرون او د میلانوسیت تحریکوونکي هورمونونه. د همدې لپاره د باردارۍ پر مهال د ښځو د ویښتو رنګ یو څه پوخ ښکاري.

لس څیزونه هره ورځ سهار خپل ځان ته ووایه

په ورځ کې سهار وخت مهم ګڼړل کيږي  که له کیڼ اړخ څخه را ویښ شئ، نو کولای شئ ډاډه شئ، چې یوه بده ورځ ستاسو په تمه ده، خو برعکس؛ که سم پیل ولرئ، نو کولای شئ په دوام یې ښه ورځ ولرئ. له ښه خوړنیز رژیم او ښو سندرو څخه پرته، نور څیزونه هم شته، چې کولای شي له تاسو سره د ښې ورځې په لرلو کې مرسته وکړي. اوس یې وخت را رسېدلی دی، چې هره ورځ سهار دا لس څیزونه خپل ځان ته ووایئ، ترڅو ښه پیل ولرئ.

نن د محشر ورځ ده

هرڅوک له نوي څیز سره مینه لري، دا ژمنه یو نوی پیل دی، چې موږ ته خوشبیني راکوي او دغه راز موږ ته د دې یادونه کوي، چې مهمه نه ده، مخکې اوضاع څومره بده وه، ځکه چې تېر، تېر شوی دی او اوس یې وخت را رسېدلی دی، چې مخ پر وړاندې حرکت وکړئ او هغه نوي فرصتونه، چې ستاسو په لور را روان دي، وې منئ.

کولای شم، هر هغه څه چې غواړم واوسم

دا یانې روحیه، موږ ټول خپل خوبونه لرو، خو ټولو ته یې نه رسېږو، ولې؟ ځکه په کافي اندازه هڅه نه کوو، خوبونو ته رسېدل ناشونی کار نه دی، ټول هغه کارونه، چې باید تاسو یې ترسره کړئ، دا دي، چې یوازې خپلې شاوخوا ته وګورئ، ترڅو فرصتونه په ښه توګه ووینئ.

مهمه ده، چې په یاد ولرئ، هغه کسان، چې خپل خوبونه یې څارلي دي او هغو ته رسېدلي دي؛ هغه کسان دي، چې هره ورځ یې خپل ځان ته ویل، (زه کولای شم)، هغوی سهار په غوسې او خپګان سره نه دي را ویښ شوي، بلکې هڅه یې کړې ده، چې په مثبت لید سره خپل سهار پیل کړي او خپله ټول هڅه یې کړې ده، چې حتا یو ګام هم خپلو خوبونو ته د نږدې کېدلو لپاره، په چټکۍ سره یې پورته کړي.

بې ارزښته څیزونه، زما ورځ نه خرابوي

ولې درته مهمه ده، چې کوم کس تاسو په اینسټاګرام کې انفالو کړي یا کله چې تاسو یې ولیدلئ، نو خپله لاره یې چپه کړه؟ د هغو څیزونو په پرتله، چې واقعاً کولای شي د یوه کس ورځ خرابه کړي، دا هېڅ په حساب کې نه راځي، په همدې دلیل هڅه وکړئ، چې خپل پام هغو څیزونو ته ور واړوئ، چې واقعاً مهم دي.

زه نن ورځ کې ژوند کوم

منو یې، چې پرون بده ورځ وه! اوضاع ښه پرمخ لاړه نه او هرڅه خراب شول، خو حدس ووهئ، چې ښه خبر څه دی؟ ښه خبر دا دی، چې پرون تېره شوې او پای ته رسېدلې ده، هر هغه څه، چې له پرون څخه پاتې دي، خاطره او درس دی، چې کولای شئ ترې وایې خلئ، نو خپله ټوله هڅه د نن لپاره وکړئ، یوازې د نن لپاره.

ماتې خوړل ستونزه نه لري

کله وخت را ویښېږو او په یاد مو راځي، چې پرون مو د یوه کار د ترسره کولو فرصت درلوده، خو په هغه کې مو ماتې وخوړه، دا ډول افکار کولای شي، چې له تاسو څخه د سهار لومړۍ برخه واخلي او پاتې ورځ مو در خرابه کړي.

هغه څه، چې باید خپل ځان ته یې ووایئ، دا دي، چې په حقیقت کې ماتې خوړل، کومه ستونزه نه لري، خپل ځان ته د دې یادونه وکړئ، چې ټول ماتې خوري، حتا بریالي کسان. موضوع داده، که وکولای شئ، چې له ستونزو څخه درس واخلئ، نو کولای شئ، چې له هغو څخه ګټه ترلاسه کړئ. ماتې یوازې د ودې او ځواکمن راتګ لپاره یو فرصت دی.

زه په خپلو کړنو ویاړم

ستاسو ټاکنې هغه څیزونه دي، چې تاسو تعریفوي، که چېرې د زړه له کومې ځان ته د دې یادونه وکړئ، چې ټاکنې مو په خپلو شرایطو کې سمې وې، نو ښه احساس به ولرئ. هېڅوک نه شي کولای، چې د سمو کارونو د ترسره کولو لپاره، په تاسو باندې نیوکه وکړي، نو په خپلو اصولو پسې ونښلئ او د نورو بېځایه او بې بنسټه خبرې نالیدلې ونیسئ.

زه ښکلی یم

ښکلا په خپل ځان باندې د باور لرلو لپاره ډېره زیاته مهمه ده او حتا یو له هغو لومړنیو څیزونو څخه، چې سهار یې خپل ځان ته وایئ، دا وي، چې تاسو ښکلي یاست! په دې ترتیب تاسو په خپل ځان کې مثبت لید رامنځته کوئ او دا لید به د عمر تر پایه له تاسو سره وي.

زه یې توان لرم

هو تاسو یې ترسره کولای شئ! څو ځله داسې شوي دي، چې غواړئ د شپې ویده شئ او په دې اړه فکر وکړئ، هغه کار چې له تاسو څخه غوښتل شوی دی، نه شئ کولای ترسره یې کړئ؟ څو ځله داسې شوي دي، چې سهار د ماتې په احساس له خوبه را ویښ شوي یاست؟ دا احمقانه ده، که تصمیم ونیسئ او هڅه وکړئ، هر کار ترسره کولای شئ.

سهار خپل ځان ته په هینداره کې ووایئ، چې تاسو په بشپړه توګه کولای شئ، دا کار ترسره کړئ او هېڅوک نه شي کولای، چې له تاسو څخه یې په غوره توګه ترسره کړي.

زه ډېر خوش قسمته یم، چې ژوندی یم

څو ځله داسې شوي دي، چې سهار له خوبه را ویښ شئ او د ژوندي پاتې کېدلو په خاطر مو د الله (ج) شکرونه پرځای کړي وي؟ موږ ټول فکر کوو، چې هره ورځ ژوندي یاستو او د همدې لپاره دا معجزه نالیدلې نیسو، خو حقیقت دا دی، چې موږ بل سهار را ویښ شوي یو او موږ ته د ژوند کولو فرصت راکړل شوی دی، چې دا یانې کولای شو، خپلو غوښتنو ته د رسېدو په لاره کې لا ډېره هڅه وکړو.

نن زما ورځ ده

په بشپړه توګه همداسې ده! که تاسو ورځ خپله نه کړئ، که تاسو هڅه ونه کړئ، چې په ټول توان سره ورپورې ونښلئ او خوشې یې نه کړئ، نو دا ورځ ده، چې ستاسو کنټرول به په خپل لاس کې واخلي او دا اصلاً ښه نه ده، ځکه چې هغه وخت په کوچنۍ پېښې سره کولای شي، تاسو وځوروي او له خپل تګلوري څخه مو لرې کړي.