اروپايي ټولنې په افغانستان کې د بشري ناورین د مخنیوي په موخه ۱۵۰ میلیونه یورو ځانګړي کړي دي

د اروپايي ټولنې د بشري مرستو او مدني خوندیتوب (ECHO) بنسټ ویلي چې په افغانستان کې بشري ناروین ته په کتو یې ۱۵۰ میلیونه یورو ځانګړې کړې دي.

نوموړي بنسټ دوشنبه د غبرګولي پر ۲۱مه په یوې خپرې کړې خبرپاڼه کې لیکلي، په افغانستان کې د ناوړه بشري وضعیت لامله، اروپايي ټولنې په دغه هېواد کې د قحطۍ ګواښ د مخنیوي په موخه د بېړنیو مرستو زېرمه فعاله کړې ده.

له دغه پیسو په ایران او پاکستان کې له مېشتو افغانانو سره مرسته

د خبرپاڼه په حواله، د دغو پیسو له ډلې به ۱۲۶ میلیونه یورو په افغانستان کې دننه، څه باندې ۱۱ میلیونه یورو به په پاکستان او نږدې همدومره نورې به په ایران کې د افغان کډوالو د اړتیاوو په پوره کولو او دغه راز د ناورینونو پر وړاندې د چمتوالي پر تیاري ولګول شي.

یاد بنسټ زیاته کړې چې د اروپايي ټولنې مالي مرستې به د زیانمنو ټولنو د اړتیاوو پوره کولو لپاره دوام مومي.

ډېری شنونکي په دې نظر دي چې که له افغانستان سره بهرنی مرستې نه وای، نو په دغه هېواد کې به د انساني ناورین څپه له دې لویه وی.

نور ولولئ:  اروپايي ټولنه وايي افغانستان په نړۍ کې د اقلیم تر سختو اغیزو لاندې هېوادونو په لېست څلورم هیواد دی

نور ولولئ:  اروپايي ټولنه: له پاکستانه راغلو افغان کډوالو سره ۶۱ میلیونه یورو مرسته کوو

نږدې نیمايي نفوس بشري مرستو ته اړتیا لري

بل پلو، د اروپايي ټولنې د ناروین مدیریت یو چارواکي ویلي چې افغانان له ناوړه بشري حالت سره مخ دي.

د نوموړي په وینا، په دغه هېواد کې څه باندې ۵۰ سلنه وګړي بشردوستانه مرستو ته اړتیا لري او څه باندې ۸۵ سلنه خلک بېوزله دي.

پر افغانستان د طالبانو له بیاواکمنېدو راوروسته د ملګرو ملتونو په ګډون ګڼو نړیوالو بنسټونو ویلي چې دا هېواد له سیاسي ناروین وراخوا د لوږې، بېکارۍ او روغتیا په برخه کې هم له ننګونو سره مخ دی.

څه موده وړاندې د ملګرو ملتونو د بشري مرستو د همغږۍ دفتر (اوچا) ویلي و چې په افغانستان کې خوراکي امنیت له ګواښ سره مخ دی.

بل لور ته د بې روزګارۍ او خلکو ته د کار د نشتوالي له امله ډېری کورنۍ د کور لومړنۍ اړتیاوې نه شي پوره کولی. له همدې امله په افغانستان کې څه باندې ۳ میلیونه ماشومان په خوارځواکۍ اخته دي او دا کچه ورځ تر بلې لوړېږي.

د یادونې وړ ده چې د مور او ماشوم مړینه هم زیاته شوي ده.