د استرالیا حکومت له خپلو لویو بانکونو او بنسټونو څخه غوښتي چې له سایبري بریدونو سره د مقابلې د لارو چارو په موندلو کې ونډه واخلي او د نوموړو بریدونو په وړاندې خپله وړتیا وازمایي
د استرالیا حکومت دا اقدام د دې هیواد د څو لویو شرکتونو د پراخو مالوماتو له غلا کېدو وروسته وکړ او اوس مهال د نوموړي هېواد پر روغتونونو، بانکي سیستم او د بریښنا پر شبکې د احتمالي سایبري بریدونو د مخنیوي لپاره چمتو کیږي.
د استرالیا هیواد د کورنیو چارو وزیر کلر وانییل د سه شنبې په ورځ د روان ميلادي کال د اپریل میاشتې په ۱۱مه وویل چې په وروستیو سایبري بریدونو کې د نوموړي هېواد د مخابراتو او صحي بیمې په شان برخې په نښه کړل شوې دي او په میلیونونو کسانو ته زیان رسيدلی دی.
نوموړي خبرداری ورکړ چې سایبري بریدونه د هکرانو د بریدونو یوه وړه برخه ده چې تر اوسه لیدل شوې ده.
د استرالیا حکومت د سایبري بریدونو د مخنیوي په هدف له لویو موسساتو سره یو لړ لوی تمرینونه پیل کړي دي څو له هغوی سره مرسته وکړي چې د هکرانو په وړاندې مقابله وکړي کوم چې هڅه کوي مالومات غلا کړي.
د استرالیا د بانکدارۍ ټولنې اجرایوي مدیرې انا بلیه چې یو صنعتي بنسټ دی د سه شنبې په ورځ د نوموړي هیواد رسنیو ته وویل چې د سایبري امنیت تمرینونه چې حکومت تنظیم کړي له سایبري بریدونو سره د مقابلې په وړاندې د نوموړي بنسټ وړتیا لوړوي.
بلخوا د استرالیا د مالي خدماتو یو لوی شرکت د سه شنبې په ورځ افشا کړه چې هغو جنایت کارانو چې تېره میاشت یې د دې شرکت د مشتریانو حساس مالومات غلا کړي وو د پیسو غوښتنه کړې ده
پر لتتیود فایننشل شرکت سایبري برید ددې لامل شو چې د ۱۴ میلیونو مشتریانو مالومات او شخصي فايلونه غلا شي چې مالي اسناد او د موټر چلوونې د جواز او پاسپورتونو نمبرونه پکې شامل وو.
نور ولولئ: دايفون کاروونکو لپاره د خطر خبر
د استرالیا حکومت اوس مهال د نویو نورمونو او ژمنو درلودنکي د سایبري امنیت د یو نوي قانون د څیړنې په حال کې دی څو د نوموړي هېواد په ټولو دولتي ادارو کې د مالوماتو د ساتلو په هدف پلی شي.
خو له دې سره- سره چارواکو خبرداری ورکړی چې سایبري جنایتکاران مسلکي شوي او قدرت او موثریت یې د زیاتیدو په حال کې دی.
