پر ښځو د طالبانو د ظلمونو پر وړاندې امریکا او بریتانیا یو لاس او متحد دي
ګارډین ورځپاڼې په خپلې یوې مقاله کې لیکلي، چې امریکا او برېتانیا د افغانستان د ښځو پر وړاندې د طالبانو په ظلمونو کې سره یو لاس دي.
دغې ورځپاڼې لیکلي، چې له افغانستانه د امریکا او برېتانیا د ناڅاپه وتلو له امله داسې یو حکومت ړنګ شو، چې د ښځو او نجونو وضعیت مخ په ښه کېدو و.
ګارډین د یکشنبې په ورځ (د وږي ۱۸مه) په دې مقاله کې زیاته کړې ده، چې د افغانستان لپاره د ملګرو ملتونو د بشري حقونو د راپور ورکوونکي ریچارډ بېنېټ د ارزونو پایلې ښيي، چې اوس مهال د افغان ښځو ژوند څومره له زغم څخه وتلی دی.
د ښځو پر وړاندې د طالبانو جنیستي توپیر
ریچارډ بېنېټ ویلي دي، چې د ښځو پر وړاندې د طالبانو د جنسیتي توپیر بنسټیز کېدل دومره پراخ شوي او ژوند یې د ښځو لپاره سخت کړی، چې اوسمهال د ښځو له خوا هر حرکت د مقاومت په توګه تعبیر کړو.
ګارډین همداراز لیکلي، چې له افغانستانه د امریکا او برېتانیا وتل د افغانستان د هغه حکومت د سقوط لامل شو، چې پکې د ښځو او نجونو وضعیت په ښه کېدو و.
نور ولولئ: ګورډن براون: د طالبانو له خوا د افغان ښځو او نجونو ځورول د بشریت ضد جنایت دی
نور ولولئ: امریکايي سفیرې د طالبانو پر وړاندې د نړۍ هېوادونه یو والي ته راوبلل
نور ولولئ: طالبان افغانستان کې ښځې له کار او زده کړو منع کوي، خو بهر کې له نیم لوڅو سره انځورونه اخلي
په دې مطلب کې راغلي، چې یادو هېوادونو له افغانستانه په وتلو سره دغه هېواد ته د طالبانو د ننوتلو لپاره لاره هواره کړه.
ګارډین لیکي، چې طالبانو له درېیو کلونو راهیسې ښځې او نجونې له خپلو لومړنیو اساسي حقونو هم بې برخې کړې دي.
د ښځو پر څېره او غږ بندیز
دې ورځپاڼې په ډاګه کړې، چې اوس مهال په افغانستان کې ښځې له کور څخه د ورزش او پلي تګ او له نارینه و سره له خبرو کولو منع شوې او همداراز د هغوی په څېرې او غږ هم بندیزونه لګېدلي دي.
یادې ورځپاڼې زیاته کړې ده، په نړۍ کې بل داسې هېواد نه شته چې ښځې او نجونې پکې د جنسیت له امله تر دې حده ځپل شوې وي.
د دې ورځپاڼې په خبره؛ د طالبانو د امربالمعروف او نهې عن المنکر وزارت نوی توشیح شوی قانون ثبات او شفافیت نه لري او له دې قانون څخه سرغړونه کولی شي د سختو مجازاتو له هغې جملې څخه د وهلو ټکولو، په عام محضر کې په دورو وهلو، په جبري توګه د تري تم کېدو او د وژنو لامل شي.
