په افغانستان کې د شیعهګانو شورا د محرم پر مراسمو د محدودیتونو د لرې کولو غوښتنه کړې ده
څو ورځې کېږي چې افغانستان کې د محرم مراسم پیل شوي، خو سږ کال طالبانو پر دې مراسمو یو لړ محدودیتونه لګولي.
د شیعه مذهب ګڼو پیروانو د یوه لاسلیک شوي غوښتنلیک په واسطه له طالبانو غوښتي چې مذهبي ازادۍ ته باید ژمن اوسېږي.
د شیعه مذهبو اعتراض په غوښتنلیک بدل شوی
کابل کې سرچینو ویلي پام کې وه چې د دې محدودیتونو په غبرګون کې د کابل ولایت مخې ته اعتراضي غونډه وشي، خو له دې ډډه شوې او غوښتنلیک وړاندې شوی. له بلې خوا د افغانستان د شیعه دیني عالمانو شورا پرون ځانګړې غونډه کې له طالبانو غوښتي چې د محرم پر مراسمو لګول شوي محدودیتونه لري کړی.
نور ولولئ: خامنه اي ویلی طالبان دی شیعه ګانو جوماتونو یواځی کې عبادت وکړی
د دې شورا غړي حسین عالمي بلخي وویل، “د وير کوونکو د غوښتنې پر بنسټ شيعه عالمان له اسلامي امارت غواړي چې د وير پر مراسمو لګولی محدوديت لېرې کړي او هېڅ ځای کې د وير مراسمو اړونده بيرغونو د پورته کولو مخه و نه نيسي.”
جوماتونو او تکیهخانو کې مراسم نه نیول
تېره اونۍ کابل کې د شیعه مذهب یو شمېر پلویانو ویلي وو چې د طالبانو د څو ادارو چارواکي شیعه مېشتو سیمو ته ورغلي او ورته یې ویلي وو چې ځینو جوماتونو او تکیه خانو کې دې د محرم مراسم نه ترسره کېږي.
شیعه مذهبي مشر سید عیسی حسیني مزاري چې د ایران پلوی دی کابل کې خبري غونډې ته وویل طالب چارواکي دې د شته ستونزو په اړه له خلکو سره مخامخ خبرې وکړي.
دی وايي “محرم یو مناسب فرصت دی چې د اسلامي امارت کسان له خلکو سره مخامخ خبرې وکړي، د هېواد او هغه ستونزې چې طالبانو ورسره مخامخ دي بیان کړي، که د خلکو همکارۍ ته اړتیا وي نو ودې وايي او له خلکو سره له نژدې اړیکي ټينګ کړي.”
خو د طالبانو حکومت وايي د محرم مراسمو لپاره یې اړین تدابیر نیولي، د کابل والي محمد قاسم خالد وايي د دې تدابیرو د یوې برخې په توګه امنیتي او فرهنګي کمیټې جوړې شوې.
نوموړی وايي “دواړه کمیټو غونډې کړي او داسې پلان جوړ شوی چې که خدای کول شیعه وروڼه به وکولی شي د امن فضا کې مراسم ترسره کړي.
خو شنونکي وايي، طالبان له داعش بریدونه ویره لري، نو ځکه یې محدودیتونه وضع کړي دي.
