سراج الدین حقاني ویلي چې له نړۍ سره د مشروع تعامل په برخه کې هېڅوک هم مخالف نه دي
سراج الدین حقاني ویلي چې په افغانستان کې هېڅ استعمار ورته د منلو نه دی او نه هم دې ته غاړه ږدي چې کوم استعمار دې راشي او پر افغان خاوره دې ولکه ټینګه کړي.
د طالبانو کورنیو چارو وزير په خوست کې د قران کريم د تلاوت په يوه سيالۍ کې ګډونوالو ته وویل، چې دوی د نړۍ له هېوادونو سره تعامل او ښې اړيکې غواړي او په افغانستان کې استعمار ورته د منلو نه دی. سراج الدین حقاني زياته کړه، چې له نړۍ سره یې ګټې او اړتیاوې تړلې دي.
په افغانستان کې د شته ستونزو په اړه اندېښنې
د طالبانو د کورنیو چارو وزير سراج الدين حقاني د دوشنبې په ورځ په خوست کې يوې غونډې ته ويلي، چې خلک دې په افغانستان کې د شته ستونزو په اړه اندېښنه نه کوي. نوموړی داسې مهال دغه خبره کوي چې افغان ولس د نجونو او ښځو پر مخ د زده کړو د دروازو پرانېستل او د کار ورکولو اجازې هېڅ څرګ نه ښکاري.
نور ولولئ: سراج حقاني د ځینو طالب مشرانو پر کړنو ناخوښ ښکاري
نور ولولئ: د جدي۶ پر افغانستان د شوروي یرغل ورځ؛ سراج حقاني: د طالبانو په حکومت کې ځان غوښتنه نه منل کېږي
سراج الدین حقاني وویل، د دوی په نظام کې له نړۍ سره د مشروع تعامل په برخه کې هيڅوک مخالف نه دی.
هغه زياته کړه: «څنګه چی لویه دنیا یو تر بل متقابل تعامل لري، موږ هم د خپلې پاليسۍ له مخې په هغه تعامل کې ځان شریکول غواړو، ځکه زموږ منافع، زموږ ضرورتونه له دنیا سره هم په تجارت او هم په ډېرو مواردو کې تړلي دي.»
د جنګ له لارې واک ته رسېدل
د طالبانو کورنیو چارو وزیر وویل، چې دوی د هغو مخالف دی، څوک چې د جنګ په پایله کې دلته راځي او تحمیليږي.
خو د سیاسي چارو کارپوهان وايي چې طالبان په خپله هم د جنګ له لارې واک ته رسېدلي دي.
طالب چارواکي له نړيوالو سره د تعامل او اړیکو ساتلو په برخه کې بېلابيل نظرونه لري.
د طالبانو مشر هبت الله اخوندزاده څو ځله په خپلو ويناوو کې ويلي، چې د نړۍ پروا نه ساتي.
هغه د همدې کال د وږي مياشتي په ۲۲ مه نېټه په جوزجان کې يوې ولسي غونډې ته ویلي و، چې دوی د شریعت په لاره کې هېڅ قوت ته نه تسلیمیږي او نه هم معامله کوي.
د یادونې وړ ده چې د طالبانو په رژیم کې دننه هم زیات شمېر د نجونو د زده کړو پلویان دي، خو یو شمېر یې بیا مخالف دي.
