چین او د برېکس غړو هېوادونو له طالبانو وغوښتل چې پر نجونو د زده کړو بندیزونه لرې کړي
په هره نړیواله غونډه کې د طالبانو له واکمن رژیم غوښتل شوي چې پر افغان نجونو لګول شوي بندیزونه لرې کړي او دوی ته د زده کړو اجازه ورکړي، خو له دې سره، سره طالبانو بیا هم نجونو او ښځو ته د کار او زده کړو اجازه نه ده ورکړي.
تازه د چين، روسیې او د برېکس نورو غړو هېوادونو مشرانو د چهارشنبې په ورځ د کازان غونډې په اعلامیه کې له طالبانو وغوښتل، چې د نجونو او ښځو پر زده کړو بندیزونه لرې کړي. دوی د خلکو د اساسي حقونو په رعایت کولو ټينګار وکړ او په سوله ییزه توګه یې د افغانستان د مسایلو د حل غوښتنه وکړه.
د افغان نجونو زده کړې او د برېکس غونډې غوښتنه
د برېکس مشرانــو د خپلې شپاړسمې ناستې په پای کې په خپره شوې اعلامیه کې د افغانستان د وګړو د بنسټیزو حقونو په ځانګړې توګه د ښځو، نجونو او د بېلابېلو قومي ډلو د حقونو پر ټینګښت ټینګار کړی دی.
نور ولولئ: رینا امیري د نجونو زده کړې اهمیت لرونکي بولي
نور ولولئ: د ایران ولسمشر پزشکیان: سیمه دې له طالبانو سره تعامل وکړي
په دې اعلامیه کې د افغانستان خلکو ته د بېړنیو او پرته له ځنډه د بشري مرستو د رسولو پر اړتیا هم ټینګار شوی او له طالبانو غوښتل شوي، چې د نجونو د منځنۍ او لوړو زده کړو بندیزونه لغوه کړي.
د برېکس مشرانو همداراز وویل: «په افغانستان کې باید د پام وړ اقدامات وشي څو اطمینان ترلاسه کړو، چې د افغانستان خاوره د ترهګرو له خوا نه کارول کېږي.»
له ترهګرو ډلو د پاکستان افغانستان غوښتنه
د اعلامیې په بله برخه کې راغلي: «مونږ له یوه داسې خپلواک او سوله ییز افغانستان څخه چې له ترهګرو او نشه یي توکو څخه پاک هېواد وي، ملاتړ کوو.»
د برېکس شپاړسمه سرمشریزه د ۳۶ هېوادونو او ۶ نړۍوالو سازمانونو په ګډون د سې شنبه په ورځ د لړم لومړۍ نیټه د روسیې فډراسیون د تاتارستان جمهوریت په کازان ښار کې پیل شوه او د لړم تر درېیمې نېټې به دوام وکړي.
په دې غونډه کې د روسیې، برازیل، هند، چین، سویلي افریقا، مصر، متحده عربي اماراتو، ایتوپیا او د ایران مشران حضور لري.
طالبانو پر افغان ښځو او نجونو ځپونکي بندیزونه وضع کړي او په دې برخه کې یې له هر ډول نرمښت او انعطاف ښودلو ډډه کړې ده.
