د طالبانو د حکومت او ترکمنستان ترمنځ څو تړونونه لاسلیک شوي دي
د طالبانو حکومت هم د پرځېدلي جمهوریت له پالیسۍ سره سم هڅه کوي چې له پاکستان سره د صادراتو او وارداتو پر ځای خپلې اړیکې د منځنۍ اسیا له هېوادونو سره پراخه کړي او خپل اقتصادي سیاست ورسره په مخ یوسي.
تازه د ترکمنستان د بهرنیو چارو وزارت په یوه اعلامیه کې ویلي چې د ترکمنستان چارواکو او طالبانو پرون (جمعه) په عشق اباد کې د اقتصادي همکاریو څو تړونونه لاسلیک کړل.
د لاسلیک شویو تړونونه موخه
دغه تړونونه د انرژۍ او ترانسپورت په برخه کې د ګډو پروژو د پلي کولو په موخه لاسلیک شوي دي.
د ترکمنستان د بهرنیو چارو وزارت ویلي چې دا موافقې ترکمنستان د چارواکو او طالبانو ترمنځ د دوه اړخیزو اقتصادي اړیکو د پراختیا لپاره شوي دي.
عشق اباد ته د طالبانو د حکومت د پلاوي مشري د کانونو او پټرولیم وزیر هدایت الله بدری کوي. د افغانستان بانک، د بهرنیو چارو، مالیې او ټولګټو وزارتونو استازي هم په پلاوي کې شامل دي.
نور ولولئ | اسلام اباد ټاپي پروژه مهمه بللې، او پر ژر پیل یې ټینګار کړی
نور ولولئ | د ټاپي پروژې لپاره برابره زمینه
نور ولولئ | د ټاپي پروژې چارې ولې ځنډېدلي دي؟
د ترکمنستان – افغانستان – پاکستان د بریښنا د انتقال پروژې پلی کول او د تورغونډۍ ریللارې لپاره د اړینو تاسیساتو جوړول په لاسلیک شویو موافقو کې شاملې دي.
د ترکمنستان رسنیو راپور ورکړی چې په ترکمنستان او افغانستان کې د ټاپی پروژې د مسوولو شرکتونو تر منځ یو تړون هم لاسلیک شوی دی. د موافقې جزئیات نه دي اعلان شوی.
د طالبانو په رسمیت نه پېژندل
ترکمنستان د نورو هېوادونو په څېر طالبان په رسمیت نه پېژني، خو د طالبانو له حکومت سره پراخې اقتصادي اړیکې لري.
له دې مخکې، د ترکمنستان له بهرنیو چارو وزیر رشید مرادوف سره له یوې انلاین یا مجازی ناستې وروسته، د طالبانو د ريیس الوزرا مرستیال ملا عبدالغنی برادر وویل چې دغه هېواد غواړي “په نژدې راتلونکې کې په افغانستان کې د ټاپي پروژې کار پیل کړي.”
ملا عبدالغنی برادر او رشید مرادوف د پنجشنبې په ورځ “د افغانستان په خاوره کې د ټاپي پروژې د پلي کولو، په تورغونډۍ بندر کې د اورګاډي د سټیشن د پراختیا، او د ترانزیت او ترانسپورتي اسانتیاوو په اړه خبرې وکړې.
له دې وړاندې د طالبانو د بهرنیو چارو وزیر امیر خان متقي ویلي وو، که دغه پروژې تطبیق شوې، نو د افغانانو لپاره یې ګټه ډېره ده او په سیمه کې به نوی اقتصادي باب پرانیستل شي.
