د میوو او سبزیو سوداګر شکایت کوي چې پر سالنګ یې موټر درول کیږي
![salang](https://afghannow.net/wp-content/uploads/2023/03/salang.jpg)
د میوو او شنیلیو یو شمیر سوداګر شکایت کوي چې د دوی د مالونو لیږدوونکي موټر پر سالنګ اوږده موده درول کیږي
دا سوداګر وایي چې د اوږدې مودې لپاره د دې موټر درول او زر د عبور اجازه نه ورکول د دې سبب کیږي چې مالونه یې وراسته شي.
د میوې او سبزیو مارکیټ مسوولینو رسنیو ته ویلي چې له سلو په زیاتو بابري موټرو کې میوه او سبزي له کاره لویدلي او سوداګر یې زیانمن شوي دي. د دې مارکیټ مسوولینو له حکومت څخه غوښتنه کړې ده چې د دوی موټرو ته دې یو جلا لین جوړ کړل شي چې تل په تګ او راتګ کې وي.
دوی زیاتوي چې له نیمو څخه زیات سوداګر یې زیانمن شوي او مالونه یې خراب شوي دي چې د پلور او لیږد وړ نه دي.
سوداګرو غوښتنه کړې ده چې د میوو او ترکاریو موټر دې د هغو موټرو په کتار کې په تمه نه درول کیږي چې مالونه یې نه خرابیږي له اوسپنې، د ډبرو سکاره او لرګي. دوی شکایت کړی چې ښاروالي پخپله یو بل پاټک دی چې د دوی مالونه ځنډوي او د خرابیدو لامل یې ګرځي.
باروړونکو موټرو ته په اجازه ورکولو کې فساد هم شته
ځینې سوداګر ادعا کوي چې یو شمیر موټرو ته له نوبت پرته له سالنګ څخه د تیریدو اجازه ورکول کیږي، ځکه چې هغوی د سالنګونو د ساتنې مسوولینو ته په رشوت کې پیسې ورکوي، خو هغه موټر چې میوې او سبزې پکې بار دې همداسې درول شوي او کومه پاملرنه نه ورته کیږي.
د کرنې او مالدارۍ خونې په دې برخه کې له حکومته د پاملرنې غوښتنه کړې
د کرنې او مالدارۍ خونې هم له حکومت څخه په دې برخه کې د جدي پاملرنې غوښتنه کړې ده او ویلي یې دي چې د میوې او سبزۍ صادراتي او ترانزیټي موټرو ته دې د عبور اجازه ورکړل شي.
د دې خونې مسوول میرویس ناصري طلوع نیوز ته ویلي:«زموږ غوښتنه دا ده چې د سوداګرو غږ دې واوریدل شي. د دوی موټر په څو ځایونو کې درول شوي دي.»
د طالبانو د سرپرست حکومت چارواکو په دې اړه څه نه دي ویلي او نه هم له رسنیو سره مرکو ته تیار شوي دي.
د کرنې او مالدارۍ خونې د مالوماتو له مخې په افغانستان کې له دوه سوه زره زیات کسان د میوې او سبزې په کاروبار بوخت دي چې ځینې یې په مخامخ ډول پکې ښکیل دي او ځینې یې هم په غیر مستقیمه توګه.
د یادونې وړ ده چې وخت ناوخت د ډیورنډ پر کرښه هم د میوو او سبزیو سوداګرو ته د عبور په مسئله کې مشکلات جوړیږي او له ګڼو مالي زیانونو سره مخ کیږي.