طالبان وايي، د اختر شپو ورځو کې د امنیت د ټینګښت لپاره یې شاوخوا لس زره سرتېري ګمارلي
طالبانو ویلې چې دوی به د خلکو لپاره د ښه امنیتي چاپیریال برابرولو په خاطر شپه او ورځ هڅې کوي تر څو د کابل اوسېدونکې په ارامۍ سره اختر تېر کړي او کومه ستونزه ورته پېښه نه شي، خو شنونکي وايي، اوس که د داعش ویره نه وي، نو ولې په دومره لوی شمېر طالبان د کابل امنیت د ټینګولو په خاطر ګمارل کېږي. دوی زیاتوي، همدا د داعش شتون ښیي چې امنیتي تدابیر سختېږي.
د مرکزي قول اردو مرستیال
د ۳۱۳ مرکزي قولاردو مرستیال امین الله طیب وايي، که څه هم د ا.ا په واکمنېدو سره هېواد کې امنیت ټينګ شوی، خو په وینا یې، بیا هم هڅه کوي چې د اختر شپو او ورځو کې هېڅ امنیتي پېښه رامنځته نهشي.
هغه وویل: «د امنیتي تدابیرو لپاره چې د ذيالحجې له لومړۍ تراوسه چې دوه ورځې اختر ته پاتې دي، د کابل ټولو سیمو او ښار دننه، د دفاع، کورنیو چارو وزارتونو او استخباراتو ګډ ځواکونه موظف شوي، څو هېڅ امنیتي ستونزه رامنځته نهشي.»
نور ولولئ: طالبان: خبریالان د “ملي امنیت ساتلو په موخه” نيول شوي وو
د نوموړي په وینا، د کابل ښار په کچه د پلټنې پوستې «چکپواینټونه» ډېر شوي او د اختر شپو او ورځو پر مهال به ټول امنیتي منسوبین پر خپلو دندو حاضر وي.
د ۳۱۳ مرکزي قولاردو مرستیال وویل: «د کابل ښار کې د لا ښه امنیت لپاره نږدې ۱۰زره سرتیري موظف شوي چې ټول به د اختر ورځو او شپو کې پر خپلو دندو وي او دې برخه کې هېڅ اندېښنه نشته او هېوادوالو ته ډاډ ورکوو چې له اندېښنې پرته د اختر ورځې ونمانځي.»
ایا له طالبانو سره د خلکو همکاري شته؟
امینالله طیب د امنیت ټينګښت برخه کې د خلکو له همکاري مننه کوي او وايي چې خلک په دوامداره توګه له امنیتي بنسټونو سره همکاري کوي او د خلکو له همکاري پرته د امنیت ټينګښت اسانه نه دی. خو شنونکي وايي چې خلک او طالبان واټن لري، نو دلته بیا همکاري ناممکنه ده.
د نوموړي په وینا، څه موده وړاندې یې د خلکو په همکاري د کابل ښار اړوند پلچرخي سیمه کې ځینې شکمن کسان هم ونیول چې خلکو یې د شکمنو فعالیتونو په اړه دوی ته خبر ورکړی و.
که څه هم طالبانو بار، بار په کابل کې د امنیت ډاډ ورکوي، خو په دې اړه چندان ډاډه نه ښکاري.
