د افغانستان د کرکټ له نولس کلنو کم عمره ملي لوبډلې له سريلانکا او بنګلهدېش سره په درې اړخیزې لوبلړۍ کې یو ځل بیا سريلانکا ته په ۴ منډو ماته ورکړه په دې توګه د دغو سیالیو پایلوبې ته ورسېده
دا پنځوس اوریزه لوبې د متحدو عربي اماراتو په ابوظبۍ ښار کې کېږي چې پکې د افغانستان له نولس کلنو د کم عمره ملي لوبډلې څلورمه لوبه او دریمه بریا وه.
د دې لوبې پچه د افغان تنکیو ځوانانو لوبډلې وګټله او پخپله یې د توپوهنې پرېکړه وکړه.
افغانستان د نعمان شاه د ۱۱۶ او د محمد هارون او سهیل خان د نیمه سلیزو په مټ د ۷ لوبغاړو په سوځېدو سیالې لوبډلې ته د ۳۲۴ منډو نسبتا ستر هدف وټاکه.
د سريلانکایۍ لوبډلې د توپوهنې پیل ښه نه و او د سر درې لوبغاړي یې ژر یو پر بل پسې وسوځېدل.
په دې لوبه کې د کیڼ لاس توپ اچوونکي بشیر احمد وځلیده
دا درې واړه لوبغاړي د افغانستان کیڼ لاسي چټک توپ اچوونکي بشیر احمد وسوځول چې وروسته یې ۴ نورې ویکټې هم واخیستې او د ټولټال ۷ لوبغاړو په سوځولو سره د دې لوبې غوره لوبغاړی هم شو.
د سريلانکا د منځ لوبغاړو نسبتا اوږده پاڼې ولوبوله او شاوون دانیل پکې په ۱۱۵ توپونو ۱۴۰ چټکې منډې وکړې.
خو دا کافي نه وه او د سريلانکا وروستۍ لوبغاړی د وروستي اوور په ۳ توپ په داسې حال کې وسوځېد چې د لوبې ګټلو لپاره یې ۵ منډو ته اړتیا درلوده.
د افغانستان د تنکیو ځوانانو لوبډله په دې درې اړخیزه لوبلړۍ کې له خپلو څلورو د دریو لوبو په ګټلو سره د پواینټونو جدول په سر کې ده او پایلوبې ته ووته.
نور ولولئ: افغان کرکټ ټیم پاکستان ته پرلپسې دویمه ماتې ورکړه
د کرکټ لوبې تعقیبونکو په وینا دا ځل د پخوا پر خلاف وړو لوبغاړو ته د لوبیدو چانس ورکړل شوی و ځکه یې ښه کارکردګي هم لرله.
ټاکل شوې چې د دغو سیالیو پایلوبه د راتلونکې پنجشنبې پر ورځ وشي.
په ورته مهال د افغانستان کرکټ ملي لوبډله نن بېرته کابل ته راغله
افغان کرکټ ملي لوبډلې له يوه بريالي سفر وروسته نن سهار وختي کابل ته راغله چې د مینه والو له تاوده هرکلي سره مخ شوه.
تر دې وړاندې افغان لوبډلې پاکستان ته ماتې نه وه ورکړې.
نور ولولئ: افغانستان کرکټ ملي لوبډلې د پاکستان کرکټ ملي لوبډلې ته ماتې ورکړه
افغان کرکټ ملي لوبډلې په خپل دغه سفر کې د پاکستان کرکټ ملي لوبډلې ته په شل اوریزه لوبلړۍ کې ۲-۱ ماتې ورکړه او اتلولي يې خپله کړه.
