د پاکستان لومړی وزیر شهباز د امریکا سفیر سره د افغانستان پر موضوع غږېدلی دی
د پاکستان د لومړي وزیر او د امریکا د سفیر ترمنځ د پاکستان پر اقتصادي پلانونو هم خبرې شوي دي. پاکستان په اقتصادي برخه کې د تاریخ تر ټولو بد حالت کې دی.
د پاکستاني رسنیو د راپور له مخې، د دغه هیواد لومړی وزیر شهباز شريف په اسلام اباد کې د امريکا سفير ډونلډ بلوم سره په لیدنه کې په افغانستان کې پرمختګونو او په پاکستان کې د اقتصادي ثبات او بهرنۍ پانګونې د راجزبولو لپاره د لویو اقتصادي اصلاحاتو پر رامنځ ته کولو غږیدلی دی.
په اکثرو برخو کې د همکارۍ ډاډ
دغه لیدنه چې د جمعې په ورځ ترسره شوې، د پاکستان لومړي وزیر د دواړو هیوادونو ترمنځ د دوه اړخيزو اړيكو له اوسنۍ کچې د خوشحالۍ په څرګندونو سره، ټینګار کړی چې د دواړو هیوادونو ترمنځ باید د سوداګرۍ، پانګونې، انرژۍ، روغتیا، دفاع، ښوونې او روزنې، کرنې او د اقلیم د بدلون په اړه په منظم ډول خبرې وشې ترڅو په دې برخو کې همکاري پیل شي.
نور ولولئ: پاکستان کې پر ګډ حکومت د مسلم لیګ نواز او پیپلز ګوند هوکړه
نور ولولئ: شهباز شریف د پاکستان لومړی وزیر وټاکل شو
ښاغلي شریف، په پاکستان کې د پانګونې د اسنانولو لپاره د رامنځ ته شوې شورا په اړه د امریکا سفیر ته معلومات ورکړي او ویلي یې دي، چې دغه شورا به هغه پانګونو ته لومړیتوب ورکړي چې پاکستان ورته اړتیا لري.
پاکستان د امریکا ښه متحد بلل شوی
په دغه غوڼډه کې د غزې د وضعیت او په افغانستان کې د پرمختګونو په اړه هم خبرې شوي دي.
ډونلډ بلوم د پاکستان لومړي وزیر ته د بیا ټاکل کیدو له امله مبارکي ورکړې او دغه هیواد یې د امریکا یو مهم متحد بللی. هغه هیله ښودلې چې د پاکستان حکومت سره به د دواړو هیوادونو ترمنځ د پراخو اړیکو جوړولو لپاره کار وکړي.
که له یوې خوا د پاکستان اقتصاد مخ پر ځوړ روان دی، خو له بل لوري په دغه هېواد کې د پاکستان پر امنیتي دستګاه تر ټولو سخت بریدونه کېږي چې په دغه بریدونو کې د پاکستان پوځیان او پولیس ژوند له لاسه ورکوي.
په پاکستان کې ټي ټي پي او بلوچ بېلتونپال د پاکستان د پوځ پر وړاندې جنګېږي. دغه وروستیو ناامنیو پاکستان وارخطا کړی دی او له همدې امله یې په افغانستان کې د طالبانو رژیم تورن کړی چې ټي ټي پي ته یې په خپله خاوره کې ځای ورکړی، خو طالبانو بیا دا ادعاوې رد کړي دي.
