طالبانو د محصل حمید جلال وژنه د خپلو وسله والو کار وباله
حمید جلال هغه مهال په کابل کې ووژل شو چې د اګست په ۱۴مه یې د طالبانو له رینجر خپل موټر مخکې کړ، خو طالبانو بې له کوم خبرداري پر هغه ډېزې وکړې او ځای پر ځای یې وواژه.
تازه د طالبانو د کورنیو چارو وزارت ومنله، چې زدهکړیال حمید جلال د دوی د ځواکونو لهخوا په ډزو وژل شوی دی.
ځینو سرچېنو افغانستان انټرنشنل ته ویلي، چې طالب وسلهوالو د سه شنبې په ورځ په کابل ښار کې د جلال پر موټر هغه مهال ډزې وکړې او نوموړی یې وواژه، چې د هغه موټر د طالبانو له رینجر موټره مخکې شو.
په پېښه کې د ښکېل کس نیول
د طالبانو د کورنیو چارو وزارت ویاند عبدالمتین قانع د پنجشنبې په ورځ وویل، چې «په پېښه کې ښکېل» کس یې نیولی دی.
قانع وايي:« دغه پېښه تر څېړنې لاندې ده او له پلټنو وروسته به نوموړی پوځي محکمې ته ولېږل شي.»
نور ولولئ: طالبان نن (اګست ۱۴مه) واک ته د رسېدو کلیزه نمانځي
نور ولولئ: جان بولټن له بایډن ادارې سره باید له افغانستانه د وتلو حساب وشي
د جلال کورنۍ ته نږدې سرچېنو افغانستان انټرنشنل ته وویل، چې نوموړی د سه شنبې په ورځ (د زمري په ۲۳مه) د خپلو ټولګيوالو سره د خپل یو ملګري د واده مبارکۍ ته تللی و چې د لارې په اوږدو کې ووژل شو.
د حمید جلال یو خپلوان وايي، هغه د موټر شاتني سیټ کې ناست و چې دوه مرمۍ یې په سر لګېدلې وې.
طالبانو له ډزو وړاندې هغوی ته د درېدو په اړه څه نه و ویلي.
د قاتل د سزا غوښتنه
دغه سرچېنه وایي، د جلال کورنۍ له طالبانو غواړي چې قاتل ته دې سخته سزا ورکړل شي.
حمید جلال، د ننگرهار ولایت اوسېدونکی او د کابل په سلام خصوصي پوهنتون کې د اقتصاد په څانګه کې زدهکړیال و، نوموړی سږ کال له دغه پوهنځي څخه فارغېدلو.
د سلام پوهنتون هم په یوې خبرتیا کې د دغه زدهکړیال په وژنه غمرازي ښودلې ده.
دغه خصوصي پوهنتون ویلي، چې حمید جلال په یوې «غملړلې» پېښه کې وژل شوی دی.
په تېرو درېیو کالو کې د طالب وسلهوالو لهخوا پر ولسي خلکو د ډزو ډېرې پېښې رپوټ شوې دي. خو تر اوسه طالبانو په دغو پېښو کې یو ښکېل کس ته هم سزا نه ده ورکړې او د دغو پېښو په اړه له څرګندونو هم په څنګ تېرېږي.
خلک بیا وايي، طالبان او ددوی محاکم خپلو کسانو ته سزاګانې نه ورکوي.
