طالبانو د ولسي جرګې پخوانی غړی ملا ترهخیل زندان ته اچولی
![mola](https://afghannow.net/wp-content/uploads/2023/10/Mola-348x196.png)
ملا ترهخیل چې د ولسي جرګې پخوانی غړی دی، طالبانو نیولی او زندان ته یې اچولی دی
یوې باوري سرچینې پژواک خبری اژانس ته ویلي، طالبانو په کابل کې د پخوانۍ ولسي جرګې غړی ملا ترهخېل نیولی دی.
دغې سرچینې د نوم نه ښودلو په شرط ویلي، د ولکه شویو ځمکو د خلاصولو کمېسیون تېره ورځ نوموړی د عدلیې وزارت ته د ځمکو د غصب د تور د سپینولو په موخه وربللی و.
نور ولولئ: د طالبانو عدلیې وزارت: تېره میاشت مو ۳۰ زره جریبه ځمکه له غصب خلاصه کړي ده
پر هغه د کابل په ډېرو سیمو کې د ګڼو ځمکو د غصبولو تورونه لا د جمهوري نظام پر مهال هم پورې شوي و؛ خو هغه مهال د یو لړ مصلحتونو او د پارلماني خوندیتوب له امله ترېنه پوښتنې نه شوې کېدای.
په دې اړه تر اوسه طالبان چوپ دي
نوموړی پرون د طالبانو د عدلیې وزارت وربللی و، که څه هم چې د عدلیې وزارت د هغه د نیول کېدو په اړه تر اوسه څه نه دي ویلي؛ خو د وزارت لهخوا په خپره شوې وینا پاڼه کې راغلي، چې دغه وزارت د ځمکو د غصب د مخنیوي او د ولکه شویو ځمکو د ستنولو په تړاو په کابل کې ناسته کړې وه.
خبر پاڼې دا راز ویلي، چې په کابل، فراه، بلخ او یو شمېر نورو ولایتونو کې د زرګونه جریبه ځمکو دوسیې او موضوعات د کمېسیون په دغې ناسته کې څېړل شوي دي.
نور ولولئ: برېښنا شرکت: له پخوانیو زورواکو مو ۱۱۸ میلیونه افغانۍ راټولې کړې
د کمېسیون د معلوماتو له مخې، دغه راز د کابل په شکردرې ولسوالۍ کې د نږدې ۳۹۰۰ جریبه ځمکې موضوع وڅېړل شوه او پرېکړه وشوه، چې د یادې ځمکې د مالکیت له مدعیانو دې سندونه او معلومات وغوښتل شي او د کرنې وزارت د سندونو کرهوالی دې هم وڅېړل شي.
په دې اړه طالبانو نور کسان هم نیولي
د طالبانو لهخوا د ملا ترهخیل او هغه ته د ورته لانجمنو څېرو د نیول کېدو په اړه لا له پخوا هم د ګڼو خلکو غوږونه بوڅ ول، ډېرو کسانو داسې انګېرله چې ملا ترهخیل به هم یوه ورځ د طالبانو له لوري د پخوانۍ ولسي جرګې د غړي الله ګل مجاهد په شان برخلیک سره مخامخېږي؛ خو تر اوسه پورې د هغه د نیولو یا ځورولو به اړه طالبانو کوم ګام نه و پورته کړی؛ خو که دا ځل هغه نیول شوی وي او یا هم هغه د حساب کتاب د ورکولو مېز ته راکاږل شي، نو کېدای شي چې د نورو هغو ځواکمنو کسانو لپاره یو شین څراغ وي، چې هم یې د خلکو او هم یې پرېمانه دولتي ځمکې ولکه کړې دي.
د یادونې وړ ده چې په دې وروستیو کې طالبانو له ګڼو پخوانیو زورواکو غصب کړي ځمکې ازادې کړي دي او لا هم دغه کار دوام لري.