په هند کې چې کوم زوم ښې زده کړې او ښه دنده ولري نو د انجلۍ کورنۍ ډېر ولور ورکوي
د ولور ورکول په سویلي آسیا کې له پېړیو راهیسې پخوانی دود دی، چې د ناوې کورنۍ د زوم کورنۍ ته نغدي پیسې، جامې، ګاڼې او نور سامان ورکوي.
که څه هم هند کې دا کار د ۱۹۶۱ کال راهیسې ناقانونه شوی، خو لا یې هم وده کړې او ډېر کله د ښځو د کورني تاوتریخوالي د رامنځته کېدو او آن د مړینې لامل کېږي.
د سویلي کلفورنیا له پوهنتونه جفري ویور او د وېرجینیا له پوهنتونه ګاور او چیپلانکر هند کې د ۱۹۳۰ او ۱۹۹۹ کلونو تر منځ شاوخوا ۷۴ زره ودونه ارزولي. موخه یې دا وه چې په دغه موده کې هند کې د ولور وده او بدلون مالوم کړي.
د هند ۱۷ ګڼ نفوسه ایالتونو کې شوې سروې
هند کې نږدې ټولې ښځې د خپل عمر شلو کلنو په وروستیو کې واده کوي. تر ۱۹۹۹ کاله په سلو کې نوي سلنه ودونو کې ولور اخیستل کېده، د ولور اندازه د ۱۹۵۰ او ۱۹۹۹ کلونو تر منځ نږدې د یو تریلیون ډالرو څلورمه برخه حسابېده.
ښاغلې ویور ویلي، د څېړنو په پایله کې یې موندلي چې اقتصادي ودې سره د ولور اندازه هم لوړه شوې په ځانګړې توګه له ۱۹۴۰ څخه تر ۱۹۸۰ پورې.
نوموړی وايي: ” په دې موده کې نارینه و زدکړې کړي او ښې دندې یې ترلاسه کړي چې دا د ولور اندازې د لوړوالي لامل شوی.”
زیات ولولئ: د 2023 غوره راتلونکی هندي ویب سیریز
د څېړنو له مخې، د ولور وده او پېدایښت د زوم د ژوند کیفیت د بدلون په پام کې نیولو سره ډېر ښه مالومېدای شي، چې د دوی د زده کړو او د عاید زیاتوالي سره تړاو لري.
یا په بله وینا، “تحصیل کړی او ښه زوم چې ښه دنده هم ولري د خسر له کوره به ډېر ولور وړي.”
د ولور د بیمې حق
دې څېړنې همدا راز موندلې، چې د ودونو په بازار کې د تحصیل کړیو زومانو د شمېر په زیاتېدو سره “د ولور بیمې حق” کچه چې ډېر تحصیل کړي زومان یې ترلاسه کوي راټيټه شوې. د څېړنې له مخې، قوي اقتصادي لاملونه د ولور د دوام لامل کېږي.
هغه کورنۍ چې د خپلو لوڼو په ودونو کې د ولور له ورکړې انکار کوي، د ټیټ کیفیت لرونکی زوم به یې وي.
اګره کې د ښځو د حقونو لپاره پر دیوال انځورګري شوې، لیکل شوي چې “ولور د ښځو سپکاوی دی.”
دا په هند کې هغه دود دی چې د ډېرو نجونو کورنۍ له ګڼو اقتصادي ستونزو سره مخامخ دي.
