ښاغلي پوټین د پنځم ځل لپاره لوړه وکړه او لکه د مخکې په څېر به شپږ کاله بشپړ کړي
د روسیې ولسمشر ولادیمیر پوتین نن په کرېملین کې په شاندارو مراسمو کې د ولسمشر په توګه د یوې بلې شپږ کلنې دورې لپاره لوړه وکړه.
ښاغلی پوتین تېره مارچ میاشت کې، د روسیې د ولسمشر په توګه د یوې بلې دورې لپاره په لوی اکثریت سره وټاکل شو.
ولادیمیر پوتین د ولسمشر په توګه خپله پنځمه دوره د اوکرایین پر وړاندې جګړه کې – چې ده ځانګړي پوځي عملیات بللی- له ولس او پوځ د ملاتړ په پار په مننې پیل کړه:
“زه په ځانګړو پوځي عملیاتو کې له ګډون کوونکو مننه کوم، غواړم د ټولو هغو کسانو مننه وکړم چې زموږ د وطن لپاره جنګېږي. “د روسیې برخلیک به یوازې موږ ټاکو … موږ به دا سخت وخت تېر کړو او بریالي به شو.”
پوټین خپل خلک متحد وبلل
ښاغلي پوتین له لوړې وروسته د وزیرانو او لوړ رتبه چارواکو په حضور کې وویل: “موږ متحد او ستر خلک یو. موږ به په ګډه ټول خنډونه له منځه یوسو، موږ به خپل ټول پلانونه ترلاسه کړو او په ګډه به بریالي شو.”
نور ولولئ: پر روسیه د اوکرایین ستر برید شنډ شوی
نور ولولئ: روسیه: د اوکراین باخموت ښار مو نیولی؛ اوکراین وايي جګړه لا روانه ده
هغه لوېدیځ ته په خطاب کې وویل، روسیه چمتو ده د هر هغه چا لپاره چې وغواړي یو “ریښتینی” ملګری وي:
“مسکو له لویدیځو هېوادونو سره د همکارۍ لپاره له خبرو ډډه نه کوي… خو که دوی له موږ سره د همکارۍ د لارو چارو په لټه کې وي. ” موږ به وګورو چې ایا دوی د پرمختګ مخې نیولو لپاره خپلو کړنو ته دوام ورکوي او زموږ په هېواد فشار راوړي یا دوی له موږ سره د همکارۍ لارې لټوي.”
ډېرو امریکايي او اروپايي استازو ګډون نه و کړی
د ولادیمیر پوتین د لوړې په مراسمو کې د امریکا متحدو ایالتونو او د اروپايي ټولنې ډېرو هېوادونو استازو ګډون نه وو کړی، خو د راپورونو له مخې فرانسې، هنګري، سلواکیا او یو شمېر نورو اروپايي هېوادونو د پرېکون په تړاو د اوکرایین له غوښتنې سره سره دې مراسمو ته خپل استازي استولي وو.
د فرانسې ولسمشر ایمانوېل مکرون پرون وویل: “موږ له روسیې یا د روسیې له خلکو سره په جګړه کې نه یو او موږ په مسکو کې د رژیم بدلېدو ته لېواله نه یو.”
د ولادیمیر پوتین د لوړې لومړني مراسم د ۲۰۰۰ کال په مې میاشت کې ترسره شول. نوموړي هغه مهال ژمنه کړې وه چې “د ډیموکراسۍ ساتنه او پراختیا” او “د روسیې ساتنه” به کوي.
