امرالله صالح وايي، طالبانو په کابل، کندهار، ننګرهار او کونړ کې سلګونه کسان بې محاکمې وژلي دي

د زرغون بهیر مشر او تېر جمهوري نظام د ولسمشر لومړي مرستیال امرالله صالح ویلي، چې طالبانو په افغانستان له حاکمیت وروسته سلګونه انسانان له محاکمې پرته وژلي دي.

نوموړي په خپل اېکس کې د طالبانو د بې محاکمې وژنو په اړه مالومات خپاره کړي او لیکلي یې دي: «په ۲۰۲۱ او ۲۰۲۲ کلونو کې د طالبانو د استخباراتو د مشر ډاکټر بشیر په نوم د یو کس له خوا په کونړ او ننګرهار ولایتونو کې شاوخوا ۱۲۰۰ کسان پرته له محاکمې او پوښتنې وژل شوي دي».

د کندهار په کوڅو کې د ملي پولیسو جسدونه

صالح زیاتوي، چې د حکومت له سقوط وروسته د کندهار ښار په کوڅو کې د محلي پولیسو جسدونه وغورځول شول، چې وروسته د بد بوی له امله سره صلیب ته دنده وسپارل شوه څو ښخ یې کړي.

د اېکس په دغه پوسټ کې په څلورسوه بستریز پوځي روغتون کې د نظامي ټپيانو یادونه شوې او لیکلي یې دي:«د جمهوري نظام عسکر چې د اګست په ۱۶ او ۱۷ نېټو په څلور سوه بستریز پوځي روغتون کې بستر شوي وو، د طالبانو د ملیشو له خوا یو په یو ووژل شول او جسدونه یې په روغتون کې په یو کانټینر کې ځای پرځای شول، چې وروسته سره صلیب ښخ کړل ».

نور ولولئ: محسن داوړ د پاکستانیو پولیسو په ډزو ژوبل شوی

نور ولولئ: پر ګیله من وزیر برید ته د افغان ولسمشرانو او سیاسیونو غبرګونونه

نوموړی وایي، چې د دغه عمل د پټولو په موخه هڅه وشوه او د جسدونو په اړه د طالبانو یو مشر رسنیو ته وویل، چې د جسدونو ډګ کانټینر یې موندلی دی.

امرالله صالح په دغه پوسټ کې د دوحې د سولې هوکړې په اړه د رسنیو د سپانسر یادونه هم کړې، چې نومونه یې ورته نه دي یاد کړي، خو لیکلي یې دي، چې دغه رسنیو د طالبانو د جنایتونو د پوښښ مخه نیوله.

نوموړی لیکي: «د دوحې د دسیسو طرحه کوونکي لا له وړاندې له سپانسر شویو او لویو رسنیو سره په تماس کې وو، تر څو د دغو جنایتونو د رسنیز پوښښ مخه ونیسي او پرې نه ږدي، چې د دوحې د دسیسو او طالب ملیشو بدمرغي افشا شي».

له ولس د صالح غوښتنه

د ولسمشر لومړي مرستیال امرالله صالح د اېکس په دغه پوسټ کې لیکلي، چې د طالبانو واکمنۍ ټول هېواد ته درد او تاوان رسولی او په ټولو یې غږ کړی، چې د دغه ډلې پر ضد سره یو موټی شي.

په ۲۰۲۳ کال کې د «رواداري» په نوم د بشري حقونو یو نوي سازمان په خپل رپوټ کې ویلي وو، چې طالبانو له خپلې واکمنۍ راهیسې د ۲۰۲۲ کال تر نومبر میاشت پورې په پنځلسو میاشتو کې په افغانستان کې ۵۳۳ ولسي خلک، د مخکیني حکومت پوځیان، سلفیان، د مقاومت جبهې غړي او نور وژلي دي.

دې تنظیم خپل رپوټ د ۲۰۲۳ کال د جنورۍ پر څلورمه خپور کړی، چې وایي‌ دوی د افغانستان په کندهار، پنجشېر، ننګرهار، سرپل او نورو ولایتونو کې د طالبانو له لوري د خپلسرو وژنو په اړه پلټنې کړې دي.

دوی دغه راز وایي، چې د طالبانو له واکمنېدو وروسته د ۲۰۲۱ کال د اګست له ۱۵مې د ۲۰۲۲م کال تر نومبر پورې ټول ۵۳۳ تنه د طالبانو د ځواکونو او ناپېژاندو کسانو له خوا وژل شوي دي، چې وایي په هغوی کې ملکي وګړي، د تېر حکومت پوځیان، د سلفي مسلک پلویان، د «ملي مقاومت جبهې» غړي او نور د طالبانو مخالفین شامل دي.