تازه؛ متقي وايي چې افغانستان کې د یوناما په شتون کې ځانګړي استازي ته اړتیا نشته

متقي د افغانستان لپاره د ملګرو ملتونو د نوي ځانګړي استازي له وړانديز سره مخالفت څرګند کړی دی

په افغانستان کې د طالبانو حکومت یو ځل بیا د افغانستان لپاره د ملګرو ملتونو د یوه ځانګړي استازي د ټاکل کېدو له وړانديز سره مخالفت وکړ.

د ملګرو ملتونو امنیت شورا د تېر ۲۰۲۳ کال په ډسمبر کې د طالبانو له حکومت سره د تعامل د څرنګوالي په اړه یو پرېکړه لیک تصویب کړ چې له مخې یې د استازي د ګومارل کېدو وړاندیز شوی و.

خو په افغانستان کې د طالبانو حکومت د بهرنيو چارو چارسمبالي وزير مولوي امير خان متقي د سیمې د هېوادونو له سفيرانو او ديپلوماتيکو ماموريتونو له مشرانو سره په ناسته کې يو ځل بيا ټينګار وکړ چې افغانستان کې د ملګرو ملتونو د استازولۍ يوناما په شتون او په افغانستان کې د ده په خبره د “يوه خپلواک مرکزي حکومت په موجوديت کې د نويو ځانګړو استازو ټاکل کېدو ته اړتيا نشته.”

د طالبانو له حکومت سره د تعامل څرنګوالی

د ملګرو ملتونو د امنيت شورا ۱۵ دايمې او غير دايمي غړو د ۲۰۲۳ کال د ډسمبر مياشتې په وروستيو کې د رايو په اکثريت په افغانستان کې د طالبانو له حکومت سره د تعامل د څرنګوالي په اړه يو پرېکړه ليک تصويب کړ او ويې ويل چې له مخې يې دغه هېواد ته د ورپېښو ننګونو د حل لپاره د نړيوالو ورښکېلولو په اړه سپارښتنې وړاندې شوې دي.

نور ولولئ: امیر خان متقي وايي، رسمیت پېژندنه د فشار په توګه کارول کېږي

نور ولولئ: متقي د قزاقستان سفیر ته: له تاسو مننه چې پر طالب چارواکو مو لګولي بندیزونه لرې کړل

نور ولولئ: متقي: له پاکستان سره ښې اړیکې غواړو

د همدې پرېکړه ليک له مخې د ملګرو ملتونو عمومي منشي انتونيو ګوتېرېش غوښتل چې افغانستان کې د طالبانو له حکومت سره د ډيپلوماسۍ لپاره يو ځانګړی استازی وګوماري چې یو ځل بيا د طالبانو د بهرنيو چارو وزير رد کړ.

د سیمې له هېوادونو سره د طالبانو اړیکې

ملګري ملتونه وايي، د نوي ځانګړي استازي له ټاکل کېدو سره به له افغانستان او اوسنيو واکمنو سره د نړيوالې ټولنې اړيکې پراخې شي خو د طالبانو د بهرنيو چارو وزير د روسيې، چين، ايران، پاکستان، ازبکستان، ترکمنستان، قزاقستان، هند ترکيې او اندونيزيا له سفيرانو او ډيپلوماتانو سره په غونډه کې چې په کابل کې جوړه شوې وه د سيمې له هېوادونو سره د دوی د حکومت اړيکې د پام وړ وبللې.

د یادونې وړ ده چې طالبانو لا هم د نړیوالو غوښتنو ته چې یوه یې هم د نجونو پر مخ د زده کړو د دروازو پرانیستل دي، ځواب نه دی ویلی.