د افغانستان لپاره د ناروې استازی بیورن هانسن په کابل کې د طالبانو د بهرنیو چارو له وزیر امیرخان متقي سره کتلي او له نړیوالې ټولنې سره یې د افغانستان د اړیکو د پراخېدو غوښتنه کړې ده.
د طالبانو د بهرنیو چارو وزارت ویلي، دا لیدنه د سېشنبې په ورځ ترسره شوې او پکې د سیاسي اړیکو، سیمهییز وضعیت او د دواړو لورو د همکاریو په اړه خبرې شوې دي. د افغانستان لپاره د ناروې استازی
د افغانستان لپاره د ناروې استازی؛ ناروې د اړیکو دوام مهم بولي
بیورن هانسن ویلي، ناروې له افغانستان سره اوږدې اړیکې لري او غواړي د دغه هېواد د ثبات او تعامل په برخه کې خپل رول ته دوام ورکړي.
هغه همداراز ټینګار کړی چې د افغانستان اوسنی وضعیت د دې اړتیا رامنځته کوي څو له نړیوالې ټولنې سره عملي او دوامدار تعامل پراخ شي.
په مقابل کې امیرخان متقي د ناروې د دریځ هرکلی کړی او ویلي یې دي چې د دواړو لورو ترمنځ همکاري کولی شي د اړیکو د پراخېدو لپاره زمینه برابره کړي.
ناروې له طالبانو سره اړیکې نه دي پرې کړي
ناروې له هغو لوېدیځو هېوادونو ګڼل کېږي چې په ۲۰۲۱ کال کې د طالبانو له بیا واکمنېدو وروسته یې له افغانستان سره خپلې اړیکې په بشپړ ډول ونه درولې.
دغه هېواد مخکې هم په اسلو کې د طالبانو او افغان سیاسي څېرو ترمنځ د خبرو کوربه پاتې شوی و.
سره له دې، ناروې تراوسه د طالبانو حکومت په رسمیت نه دی پېژندلی، خو د ډیپلوماټیک تعامل او بشري همکاریو لړۍ یې روانه ساتلې ده.
شنونکي وایي، د افغانستان لپاره د ناروې استازي وروستۍ څرګندونې ښيي چې ځینې اروپايي هېوادونه هڅه کوي له کابل سره محدود سیاسي او تخنیکي تعامل وساتي.
