له باجوړ څخه امنیتي سرچینې وایي، د باجوړ برید پر مهال د پاکستاني پوځ پر یوه مرکز خونړی برید شوی چې له امله یې لسګونو پوځیانو ته مرګژوبله اوښتې ده.
د سرچینو په وینا، دا برید تېره شپه د باجوړ په لوی ماموند سیمه کې د «دامنګي سکاوټس» پر مرکز ترسره شوی دی. راپورونه ښيي چې لومړی موټربم چاودنه شوې او وروسته څو وسلوال مرکز ته ننوتلي دي.
د باجوړ برید کې ۲۵ پوځیان وژل شوي
سرچینې ادعا کوي چې په دې برید کې شاوخوا ۲۵ پاکستاني پوځیان وژل شوي او ۳۵ نور ټپیان دي، خو پاکستاني چارواکو تر اوسه د مرګژوبلې رسمي شمېر نه دی اعلان کړی.
د راپورونو له مخې، د باجوړ برید پر مهال د پوځ مرکز ته هم درانه زیانونه اوښتي او یو شمېر وسلې هم له برید وروسته د وسلوالو لاس ته ورغلې دي.
د خیبر پښتونخوا امنیتي وضعیت لا پسې ترینګلی شوی
دا برید داسې مهال کېږي چې تر دې وړاندې هم د بنو په سیمه کې پر پاکستاني ځواکونو خونړی برید شوی و. شنونکي وایي، د وروستیو بریدونو زیاتېدو د خیبر پښتونخوا په امنیتي وضعیت اندېښنې زیاتې کړې دي.
تر اوسه کومې ډلې په رسمي ډول د باجوړ برید مسوولیت نه دی منلی، خو په ټولنیزو رسنیو کې د برید اړوند ځینې ویډیوګانې او انځورونه خپاره شوي دي.
امنیتي وضعیت ته د نږدې سرچینو په باور، د خیبر پښتونخوا په ځینو سیمو کې د وسلهوالو فعالیتونو زیاتېدو پاکستاني پوځ له نوو امنیتي ننګونو سره مخ کړی دی.
