د بخښنې نړیوال سازمان کابل کې د هغو زرګونه کمرو د نصب په اړه غبرګون ښوولی چې طالبان یې د لګولو اعلان کړی و
د بخښنې نړیوال سازمان د پنجشنې په ورځ ویلي، چې طالبان د زرګونه نویو امنیتي کمرو په لګولو، پر افغانانو د څارنې او پلټنې یو بشپړ سیسټم جوړوي.
دغه سازمان وایي، چې طالبان ۶۲ زره امنیتي کمرې په کابل او د هېواد نورو سیمو کې لګوي.
خو طالبان دا کمرې د امنیت لپاره مهمې بولي
د طالبانو د کورنیو چارو وزارت د چهارشنبې په ورځ د وږي په ۸مه اعلان وکړ، چې د کابل ښار د امنیت د ټینګښت په موخه یې د پلازمېنې په ځینو برخو کې امنیتي کمرې لګولې دي.
د طالبانو تر واک لاندې ملي ټلویزیون مرستیال هدایت الله هدایت په اېکس شبکه کې لیکلي، چې د خلکو په همکارۍ یې د کابل ښار په ځینو برخو کې ۶۰ زره امنیتي کمرې لګولې دي.
نور ولولئ: طالبان کابل ښار کې شپېته زره امنیتي کمرې نسبوي
د بخښنې نړۍوال سازمان خبرداری ورکړی، چې طالبان د امنیت د ټینګښت په پلمه د دغو څارونکو کمرو په لګولو، د خلکو په ځانګړې توګه د ښځو ازادي له منځه وړي او د خلکو پر شخصي حریم تېری دی.
د بخښنې نړۍوال سازمان مت محمودي ویلي:«د څارنې دغه سیسټم په تدریجي ډول پر خصوصي حریم ښکاره تیری او د خلکو د راټولېدنو او لاریونونو ازادي له منځه وړي.»
ددې سسټم برابرونکی هواوې شرکت دی
ویل کېږي، چې د هواوې چینایي شرکت طالبانو سره د دغه سیسټم په چمتو کولو کې همکاري کوي.
طالبانو ویلي، چې دغه کمرې د جرمونو او ځینو نورو ګواښونو د مخنیوي او مبارزې لپاره اړینې دي.
د ولسي خلکو د ازادۍ ملاتړو په ځلونو خبرداری ورکړی، چې د چین او ایران په څېر غیرډیمواکراټیک حکومتونه له دغو کمرو د خپلو معترضانو د پېژنګلوي او نیونې لپاره کار اخلي.
نور ولولئ: چین څه غواړي؟ هواوې شرکت افغانستان کې د داعش د څار لپاره کمرې نسبوي
په کابل کې د خلکو د ګڼې ګوڼې په ځایونو او څلور لارو کې د امنیتي کمرو د نصبولو کار په ۲۰۰۸ کال کې پخواني رژیم د ملي امنیت د ریاست له خوا د امریکا د متحده ایالاتو په مالي ملاتړ پیل شوی و، چې په ترڅ کې ددغه ښار په اکثرو څلور لاریو کې شاوخوا ۳۰۰ امنیتي کمرې نصب شوې وې.
