د طالبانو د لوړو زده کړو وزیر ندا محمد ندیم د جوماتونو له ملا امامانو غوښتي چې د اعدام د حکم له عملي کېدو دفاع وکړي

هاخوا د نړیوالو بنسټونو لخوا پر طالبانو فشارونه راوړل شوي چې د اعدامونو سلسله ودروي او اعدامونه دې نور ودروي.

تازه د طالبانو د لوړو زده کړو وزیر ندا محمد ندیم د وروستیو اعدامونو په تړاو د نړۍوالو غبرګونو په اړه وویل، چې دیني عالمان دې د ممبر له لارې د قصاص د حکم د عملي کېدو څخه دفاع وکړي.

اروپايي ټولنې په خپل وروستي غبرګون وروسته له هغه له طالبانو د اعدامونو د درولو غوښتنه وکړه چې په غزني او جوزجان ولایتونو کې یې څو کسان اعدام کړل.

کفري نړۍ د قصاص حکم غندي

د طالبانو د لوړو زده کړو وزیر ندا محمد ندیم نن یکشنبه (د کب ۱۳مه) د جامعه‌الایمان د احادیثو لویې دورې فراغت‌ غونډې ته د خبرو پرمهال وویل، چې دغه ډلې پرلپسې په ولایتونو کې قصاص حکمونه عملي کړل؛ خو کفري نړۍ یې پر ضد غږونه پورته کړل.

ندا محمد محمد وايي؛ نړۍوال پر طالبانو نیوکه کوي، چې د عامو خلکو په مخکې د قصاص حکم عملي کوي؛ خو دوی د فلسطین غزې د ماشومانو او ښځو د وژلو پر وړاندې چپ او نه یې غندي.

نور ولولئ: په تحصیلي بنسټونو کې د اصلاحاتو د راوستو په نوم د لوړو زده ‌کړو وزارت هڅې

نور ولولئ: طالب وزیر وایي، له اړتیاوو سره سم محصلین روزو

نور ولولئ: د لوړو زده‌کړو بې کفایته وزیر او د زده‌کړو پر کیفیت یې بحث

ندا محمد ندیم له دیني عالمانو غواړي، چې له ممبره ګټه پورته کړي او د قصاص په اړه د کفري هېوادونو دې غبرګون ته ځواب ورکړی او د خپل اسلامي نظام څخه ملاتړ وکړی.

د طالبانو د اعدامونو لړۍ

طالبانو تېره دوشنبه په جوزجان کې یو کس په یوه لوبغالي کې اعدام کړ؛ تر هغه پنځه ورځې مخکې یې هم دوه کسان د غزني ښار په یوه لوبغالي قصاص کړل.

د طالبانو دغه اعدام باندې پر نورو بشري حقونو ادارو سربېره ملګرو ملتونو او د بښنې نړۍوال سازمان هم نیوکه وکړه.

په غزني کې د طالبانو تر اعدام وروسته په همغه ورځ د افغانستان لپاره د ملګرو ملتونو ځانګړي دفتر یا یوناما وویل، چې ملګري ملتونه د اعدام د مجازاتو مخالف دي.

یوناما په خپل اېکس کې له طالبانو غوښتي چې ژر تر ژره د اعدام مجازات لغوه کړي.

دارنګه د بښنې نړیوال سازمان هم د طالبانو وروستي اعدامونه غندي وو.

د یادونې وړ ده چې د طالبانو پر قضايي سیستم هم نیوکې کېږي او ویل کېږي چې دوی قضايي پېښې سمې نه شي څېړلی او بل متهمینو ته د مدافع وکیل حق هم نه ورکول کېږي.