د هند لومړی وزیر مودي وايي چې جي۲۰ هېوادونو د افریقایي ټولنې دایمي غړیتوب ته غاړه ایښي ده
د هند لومړي وزیر نریندرا مودي په نوي ډیلي کې د جي شل سرمشریزې د پرانیستې پر مهال وویل، چې افریقایي ټولنه به د دایمي غړې په توګه له دې ډلې سره یوځای شي.
نور ولولئ: د هند د خپلواکۍ ورځ؛ مودي مانیپور ایالت کې پر تاوتریخوالي خبرې کړي
د سيانان د راپور له مخې د هند لومړي وزیر ټینګار وکړ، چې د جي شل په ډله کې د افریقایي ټولنې غړیتوب به د همکارۍ د پیاوړتیا لامل شي.
ښاغلي مودي زیاته کړه: “زه ډاډه یم، چې هرڅوک د دغه غړیتوب پلوي دي.”
د هند پر ځای د بهارت یادونه
د هند لومړي وزیر د خطابې له دریځ د هند پر ځای د بهارت نوم واخیست او ویې ویل چې د هند اصلي نوم بهارت دی، ځکه داد سانسکریت ژبې سره تړلی او بهارت د هندي ملتونو له لوري حمایه کېده او بهارت تر ټولو ښکلی نوم دی. ښاغلي مودي د جي ۲۰ هېوادونو سرمشریزه د هند په کوربه توب پرانیسته او ویې ویل چې ډېر ژر به افریقايي ټولنه هم ددې بهیر غړي شي، چې افریقایانو ددې هر کلی کړی دی.
د جي شل ډلې سرمشریزه د شنبې په ورځ په ډیلي کې جوړه شوه.
د جي شل ډلې هېوادونو ترڅنګ د نهو نورو هېوادونو (بنګله دېش، مصر، هسپانیا، موریس، نایجریا، هالنډ، متحده عربي اماراتو، عمان او سینګاپور) مشرانو ته هم په دغو مراسمو کې د ګډون بلنه ورکړل شوې ده.
په دې غونډه کې د چین او روسیې ولسمشران نشته
د جی۲۰ هېوادونو په دې غونډه کې چې په نوي ډیلي ترسره کېږي، د روسیې ولسمشر ویلادیمیر پوتین او د چین ولسمشر ګډون نه کوي، بلکې د روسیې په استازیتوب د روسیې د بهرنیو چارو وزیر سرګي لاوروف د روسي پلاوي مشري کوي.
نور ولولئ: د هند د دوو قومونو تر منځ شخړه؛ لومړی وزیر یې اپوزیسیون سره کرکېچ مخ کېږي
د دغو هېوادونو مشران په ډیلي کې سره راټول شوي، چې په مهمو نړیوالو مسلو خبرې وکړي.
دا په داسې حال کې ده چې ګڼو رسنیو د روسیې او چین ولسمشرانو نه ګډون یوه ننګونکې مسئله بللي ده او ویلې یې دي چې دا غونډه به د تېر په څېر اغېزناکه نه وي، ځکه د یادو هېوادونو ولسمشران په کې ګډون نه لري. خو څو ورځې وړاندې د هند بهرنیو چارو وزیر ویلي وو چې د چین او روسیې ولسمشرانو نه ګډون به په غونډه هېڅ اغېز ونه لري.
