شمالي کوریا پر مسکو وسلې پلوري، خو واشنګټن خبرداری ورکړی
![f8b846b8 1219 4e59 82e5 cfc485231b5c](https://afghannow.net/wp-content/uploads/2023/09/f8b846b8-1219-4e59-82e5-cfc485231b5c-348x196.jpg)
واشنګټن شمالي کوریا ته پر مسکو د وسلو پلورلو د ناوړه پایو خبرداری ورکړی
شمالي کوریا ته د سپنې ماڼۍ د خبرداري ژبه له ګواښه ډکه ښکاري تر څو پر مسکو د وسلو له پلور ډډه وکړي
د سپېنې ماڼۍ د ملي امنیت سلاکار جک سالیوان سېشنبه وویل، که پیونګ یانګ مسکو ته وسلې ورکړي، نو دا به ورته ګرانه تمامه شي.
نور ولولئ: د اوکراین ډرون روسی سوپر سونیک بمغورځونکی له منځه یووړ
ښاغلي سالیوان زیاته کړه چې د وسلو لپاره شمالي کوریا ته مراجعه دا روښانوي چې روسیه په څنګه وضعیت کې ده.
هغه وویل چې مسکو به د شمالي کوریا وسلې د اوکرایین ښاري سیمو کې د خوړو پر زېرمو او د تودوخې پر تاسیساتو بریدونو لپاره وکاروي.
کېم جونګ اون او د پوتین د لیدلو احتمال
په دې وروستیو کې داسې رپوټونه خپاره شوي، چې د شمالي کوریا مشر کېم جونګ اون ښايي روانه میاشت د روسیې له ولسمشر ولادیمیر پوتین سره لیدو لپاره دغه هېواد ته ولاړ شي.
په دغو رپوټونو کې راغلي چې دواړه مشران به د پیونګ یانګ لخوا مسکو ته د اوکرایین په جګړه کې ملاتړ لپاره د وسلو ورکولو پر امکان خبرې وکړي.
د روسیې دفاع وزیر سرګیې شویګو په جولای کې شماليکوریا ته تللی و
د روسیې دفاع وزیر سرګیې شویګو په جولای میاشت کې شماليکوریا ته تللی او د دغه هېواد د پوځي تجهیزاتو نندارتون کتلی و.
نیویارک ټایمز لیکلي، روسیه پام کې لري چې له پیونګ یانګ د توپ مرمۍ او ټانک ضد راکټونه وپېري.
د روسیې او شمالي کوریا تر منځ د لیدنې دوام
دې ورځپاڼې د امریکايي چارواکو په حواله زیاته کړې، چې کېم جونګ اون ښايي په خپل زغره وال اورګاډي کې د روسیې ختیځ کې ولادیوستوک بندري ښار ته ولاړ شي او هلته په یوې اقتصادي غونډه کې ګډون وکړي.
دغه غونډه د سپتمبر له لسمې تر دیارلسمي دوام کوي او ښاغلی کېم به یې په څنډه کې له ولسمشر پوتین سره هم وګوري.
نور ولولئ: مسکو کې ډرون بریدونه؛ زېلېنسکي وايي جګړه د روسیې خاورې ته ورګرځي
ویل کېږي شمالي کوریا پر روسیې د وسلو پلورلو په بدل کې له دغه هېواد د سپوږمکیو په ګډون د عصري ټکنالوژۍ غوښتنه کوي.
د کارپوهانو په باور که چېرته شمالي کوریا پر روسیه وسلې وپلوري، نو کېدای چې مسکو په اوکراین کې امریکا او غربي هېوادونو ته یو لوی سرخوږی جوړ کړي.