د کندهار ولایت لپاره د طالبانو والي خلکو ته امر کړی چې له تصویر او ویډیو اخیستو ډډه وکړي
د کندهار د والي ویاند محمود اعزام رسنیو ته ویلي چې د دغه ولایت والي ملا محمدشېرین اخوند د یکشنبې په ورځ د کندهار ملکي او نظامي ادارو ته یو مکتوب لېږلی چې پر بنسټ یې باید د «ژوندیو» موجوداتو له تصویر او ویډیو اخیستلو څخه ډډه وکړي. هغه وايي چې یاد حکم عامو وګړو لپاره نهدی.
نوموړی زیاتوي: «د کندهار ولایت مقام د دغه ولایت ټولو مسوولانو او ادارو ته لارښوونه کړې چې په راتلونکي کې د ژوندیو موجوداتو له تصویر او ویډیو اخیستو څخه ډډه وکړي؛ ځکه دغه کار له ګټې نه ډېر زیان لري.»
د خبریالانو اندېښنې
په ورته وخت کې د افغانستان د خبريالانو اتحاديې مسوولان په کندهار کې د ژوندیو موجوداتو د تصویر او ویډیو پر اخيستو لګېدلي بنديز اندېښمن کړي او ویلي یې دي چې دغه کار به خبريالانو ته په سرخوږي بدل شي.
دوی د اسلامي امارت له چارواکو غواړي چې اطلاعاتو ته د لاسرسي لپاره د ټولیزو رسنیو قانون تصویب کړي.
نور ولولئ: هوټلونو ته د امربالمعروف نوی امر
نور ولولئ: خوست کې له پاکستان د لوبو ګټلو په ویاړ زرګونه کتابونه ویشل شوي
نور ولولئ: افغانستان کې طالبانو پر ځینو کتابونو بندیز ولګاوه
د افغانستان د خبريالانو اتحاديې رییس حفيظالله بارکزی وايي: «د ژوندیو موجوداتو د تصویر او ویډیو پر اخیستو بندیز په راتلونکي کې د رسنیو کار له ستونزو سره مخامخ کوي او هغه ستونزې چې اوس شته، د پالیسي نه لرلو له کبله دي. سرپرست حکومت باید اطلاعاتو ته د لاسرسي په موخه د ټولیزو رسنیو قانون تصویب کړي.»
طالبان یو څه وايي او کېږي بل څه
طالبانو بار، بار د رسنیو د فعالیت لپاره د نوي قانون د توشیح کولو خبر ورکړی او ویلي یې دي چې دوی دغه قانون د طالبانو امیر ملا هیبت الله اخند ته لېږلی دی. خو تر اوسه لا هم د هغه قانون په اړه بیا رسنیو ته تازه معلومات نه دي ورکړل شوي.
په ورته وخت کې خبریالان له طالبانو غواړي چې د يادې پرېکړې په اړه له سره غور وکړي او بېرته یې واخلي، ځکه نننۍ نړۍ د ټکنالوژي او خبر رسولو نړۍ ده.
د یادونې وړ ده چې طالبان په داسې حال کې پر تصویر او ویډیو اخیستو بندیز لګوي چې ددوی تر کنټرول لاندې ملي ټلويزویون او نورې رسنۍ همدا د دوی تصویر اخلي او خپروي یې. پر دې سربېره داسې ښکاري چې د کندهار او کابل واکمني د نظر اختلاف هم لري.
