تېره ورځ له کابل پوهنتون له بېلابېلو پوهنځیو ۲۵۰۰ محصلان فارغ شول، خو د دوی ټولیګوالې په کورونو کې پاتې شوې
طالبان له شاوخوا دوه نیم کاله حکومتوالۍ وروسته بیا هم حاضر نه دي چې نجونو ته اجازه ورکړي تر څو زدهکړې وکړي او یا هم د کار اجازه ولري.
د رسنیو په راپورونو کې لیدل کېږي چې هغه نجونو په سرو سترګو ژاړي چې دوی په کورونو له نیمګړو زده کړو سره پاتې شوې او نارینه همزولي ټولیګوال یې فارغ شول او د فراغت جشن یې ونیوه.
د نجونو پر لوړو زدهکړو او پوهنتون ته د دوی پر تګ د لګېدلي بندیز له یو کال تېرېدو سره هممهاله، تېره ورځ په کابل پوهنتون کې د ۲۵۰۰ نارینه زدهکړیالانو د فراغت غونډه ونمانځله.
داسې ښکارېده چې طالبانو دا فراغت غونډه له ځانښودنې لپاره نیولي وه
په دغې غونډه کې د طالبانو د کورنیو چارو وزیر سراج الدین حقاني، د دغې ډلې د ملي دفاع وزیر مولوي یعقوب مجاهد او د دوی د لوړو زدهکړو وزیر ندا محمد ندیم هم ګډون کړی و.
ندا محمد ندیم په دغه غونډه کې ويلي، چې ډله یې په هېواد کې د زدهکړو پراختیا او پرمختګ ته ژمنه ده او په وینا یې« که څه هم بهرنیان د هېواد د پرمختګ په برخه کې ځینې وړاندیزونه لري؛ خو په حقیقت کې زموږ د پرمختګ غوښتونکي نه دي.»
نور ولولئ: سیګار وايي، په انجیوګانو کې پر ښځو د طالبانو بندیز د نجونو لومړنۍ زده کړې اغېزمنې کړي
نور ولولئ: رینا امیري د نجونو زده کړې اهمیت لرونکي بولي
ورته مهال د طالبانو د کورنیو چارو وزیر سراج الدین حقاني بیا لوستي او د لوړو زدهکړو فارغان د هېواد له پاره اړینه پانګه بللې ده.
د ښځو د زده کړو د بندښت امر
خو دوی د خپلو دغو څرګندونو خلاف؛ تېر کال په ډسمبر میاشت کې د یوه مکتوب په خپرولو سره ټولو دولتي او خصوصي پوهنتونونو ته خبر ورکړ، چې تر امرثاني په پوهنتونونو کې د نجونو زدهکړې وځنډېدې.
د دغه خبر په خپرېدو د کابل د طب پوهنتون یوې زدهکړیالې خپل ځان وواژه، د پوهنتون ځینو استادانو استعفاوې ورکړې او نارینه زدهکړیالانو هم خپلو ټولګیو ته له تګ ډډه وکړه؛ خو دغه ټول اعتراضونه بې پایلې وو.
که څه هم دغه پرېکړه او بندیز د نورو بندیزونو يه څېر تر نړۍوالې کچې وغندل شو؛ خو د یو کال په تېرېدو لا هم دوی له خپلې پرېکړې نه دي په شا شوي.
سره له دې چې ملت او د نجونو وارثان له طالبانو برابر غوښتی تر څو د نجونو پر مخ د زده کړو دروازې پرانیزي خو تر اوسه یې د پرانیستلو هیڅ څرک نه ښکاري.
