کابل:د ازبکستان سره د وسپنې پټلۍ نقشه دې وروستۍ شي

ځړول شوی:مې 14, 2022 لخوا ځړول شوی:مسعود تبصرې:0

د بهرنیو چارو وزارت سرپرست امیر خان متقي د ازبکستان لومړي وزیر له مرستیال او سوداګرۍ وزیر سره د یو ویډیوي کنفرانس له لارې د دواړو هېوادونو تر منځ د وسپنې پټلۍ لارنقشې وروستۍ کېدو په اړه خبرې کړې دي. د بهرنیو چارو وزارت ویاند پر خپل ټوېټر پاڼه لیکلي، کابل او تاشکند په‌دې کنفرانس کې د سوداګرۍ پر ودې، ټرانزیټ او د ترمز-مزار-کابل-پېښور د وسپنې پټلۍ په اړه ټینګار کړی دی.

د افغانستان د وسپنې پټلۍ ادارې رییس وایي، د ټرانس-افغانستان د رېل پټلۍ د سروې کار به تر یوې بلې میاشتې پورې پیل شي. د افغانستان د وسپنې پټلۍ ادارې رییس بخت‌الرحمن شرافت وايي: «له تخنیکي ډلې د سروې تمه ډېره ده چې کارونه په دې میاشت کې پیل کړي. اوس‌مهال په ټولو ادارو کې پر همدې موضوع خبرې پیل شوي.» بل‌خوا د سوداګرۍ او پانګه‌ونې خونه وایي، د افغانستان له لارې  له سویلي اسیا سره د منځنۍ اسیا نښلول کېدل د افغانستان د سوداګریزو اړیکو د پراختیا په برخه کې مثبت اغېز لري.

د سوداګرۍ او پانګه‌ونې خونې سوداګریز مرستیال خیرالدین مایل وايي: «د درې واړو هېوادونو لپاره په سوداګرۍ، صادراتو او وارداتو برخه کې مهم نقش لري. سوداګرۍ او پانګه‌ونې خونه له دې کاره هرکلی کوي.»

نور یی ولوله | په جوزجان کې د درسونو له پیلېدو د ښځینه زده‌کړیالانو هرکلی

بل‌خوا د اقتصاد وزارت وایي، د ټرانس افغانستان د وسپنې پر پټلۍ د کار په پېلېدو سره په څو ولایتونو کې افغانانو ته د کار زمینه برابرېږي. د اقتصاد وزارت مرستیال عبداللطیف نظري وايي: «د افغانستان، ترکمنستان او پاکستان د وسپنې پټلۍ کولای شي افغانستان د سیمې په مرکز تبدیل کړي او د دندو پیدا کېدو او بې‌وزلۍ په کمېدو کې مهم رول لري.»

د افغانستان د وسپنې پټلۍ ادارې له لوري د برابر شوي پلان له مخې، د ټرانس-افغانستان د وسپنې پتلۍ، له مزار، سمنګان، پلخمري، کابل، لوګر او جلال‌اباده په تېرېدو سره پېښور ته رسېږي. د کورنیو چارو وزارت د دې پروژې د تخنیکي ډلو د امنیت ساتلو مسوولیت پر غاړه اخیستی دی.

ځواب دلته پرېږدئ

ستاسو برېښناليک به نه خپريږي.

زموږ په خبر پاڼه کې ګډون وکړئ
وروستي مقالې، دندې، وړیا، تفریحي خبرونه په مستقیم ډول ستاسو ان باکس ته وړاندې کړئ.
170000 پیرودونکي دلته دي.