کندهار ولایت کې د شدیدو بارانونو ورېدو له امله ځینې کورونه نړېدلي
![qandahar](https://afghannow.net/wp-content/uploads/2024/03/Qandahar-780x470.jpg)
طالبان وايي چې په کندهار ولایت کې د شدیدو بارانونو ورېدو له امله ځینې کورونه نړېدلې چې ۲ تنه په کې مړه شوي هم دي
هاخوا له نورو ولایتونو هم راپورونه ورکړل شوي چې د درنې واورې او پرله پسې بارانونو له امله لږ تر لږه ۹ کسان مړه شوي او په زرګونو څاروي له منځه تللي دي.
په کندهار کې د تېرو پرلهپسې دوو ورځو سختو بارانونو یوشمېر کورونه نړولي او له کبله یې دوو کسانو خپل ژوند هم له لاسه ورکړی دی. د دغه ولایت مسوولان د دغه ولایت په بېلابېلو سیمو کې له راوتلو سېلابونو څخه د سلګونو کسانو د ژغورلو خبر هم ورکوي.
شدیدو بارانونو او توپانونو زیان اړولی
د کندهار د سرې میاشتې ټولنې ویاند محمدشعیب حقاني رسنیو ته ویلي چې بارانونو د دغه ولایت د مرکز په درېیمه حوزه کې دوه کورونه او د میوند ولسوالي په بند تیمور کلي کې هم شپږ کورونه نړولي دي.
د نوموړي په وینا، په میوند ولسوالي کې د کورونو نړېدو پېښه کې د یوه ماشوم په ګډون، دوو کسانو خپل ژوند له لاسه ورکړی دی. هغه وايي، زیانمنو شویو کورنیو ته یې بېړنۍ مرستې ور رسولې دي.
نور ولولئ: د هېواد په بېلا بېلو ولایتونو کې سیلابونه
نور ولولئ: اوچا وايي افغانستان کې ۲۱.۲ میلیونه خلک د څښلو اوبو ته لاس رسی نه لري
نور ولولئ: وروستي سیلابونه؛ افغانستان کې یې خلکو ته درانه ځاني او مالي زیانونه اړولي
په همدې حال کې د البدر قولاردو ویاند نذیراحمد شکېب وايي چې د سختو بارانونو له امله د کندهار په بېلابېلو سیمو کې سېلابونه راوتلي او له امله یې یوشمېر کسانو ته زیانونه هم اوښتي دي.
هغه زیاتوي چې د یادې قولاردو مسوولانو په دامان ولسوالي کې د مسافرو څلور بسونه چې سېلاب ایسار کړي وو، ژغورلي دي. شکېب وايي، په دمنډحصار سیمه کې یې هم د کوچیانو یوشمېر کورونه چې سېلابونه ایسار کړي وو، ژغورلي دي.
بلهخوا د کندهار پر یوشمېر لویو لارو پراخ سېلابونه راوتلي چې له امله یې د کندهار-روزګان او کندهار-سپینبولدک لارې هم تړل شوې دي.
په نورو ولایتونو کې زیانونه
د افغانستان په ۳۱ ولایتونو کې سختې واورې او بارانونه شوي دي. داسې راپورونه ورکړل شوي چې د غور ولایت اکثره موصلاتي لارې تړل شوي.
په دغه ولایت کې له ۲۵۰۰ زیات څاروي د واورې او ساړه له امله مړه شوي دي.
د طالبانو تر کنټرول لاندې ملي راډیو خبر ورکړی چې په ځینو ولایتونو کې د بېړنیو پېښو ته د رسېدو کمېټې هڅې پیل کړي چې خلکو او څارویو ته خواړه او نور اړین توکي ورسوي، خو خلک بیا وايي چې لارې تړل شوي او د مرستو رسول امکان نه لري.