طالبانو ویلي چې افغانستان په تېر یو کال کې ۱۰ میلیارده ډالره سوداګري درلوده
د طالبانو تر واک لاندې صنعت او سوداګرۍ وزارت چارواکو ویلي چې افغانستان تېر یو کال کې شاوخوا لس میلیارده ډالره سوداګري درلوده.
دغه خبرې د طالبانو د صنعت او سوداګرۍ وزارت چارواکو چهارشنبه د زمري پر ۱۰مه د اطلاعاتو او رسنیو مرکز کې «د دې ډلې د ادارو کلنۍ لاسته راوړنو د تشریح» پروګرام پر مهال کړې دي.
د دغه وزارت په خبره، دغو ۱۰ میلیاره ډالرو څخه ۱.۸ میلیارده په صادراتو او پاتې څه باندې ۸ میلیارده ډالره یې په وارداتو لږېدلي.
کومو هېوادونو ته سوداګري ډېره شوې؟
دغو چارواکو زیاته کړې چې د افغانستان د صادراتو کچه قزاقستان ته ۲.۵ سلنه، چین ته ۱۶ سلنه، ایران ته ۱۹ سلنه، ترکیې ته ۵۲ سلنه او روسیې ته ۵۴ سلنه ډېره شوې ده.
د دوی د څرګندونو لهمخې، په دې موده کې ۱۰۰ فابریکې پرانیستل، څه باندې ۱۰۰۰ صنعتي او تولیدي شکتونو ته جوازونه ورکول، شاوخوا ۶۵۰ فابریکو ته تعرفې صادر او څه باندې ۲۳ زره د سوداګرۍ جوازونه تمدید، نوي او اصلاح شوي دي.
نور ولولئ: پر ښځو د طالبانو د بندیزونو دوام؛ یو شمېر نجونو انلاین سوداګري پيل کړې
نور ولولئ: ملا برادر او قزاقستاني چارواکي د اوسپنې پټلۍ پر نوي شبکه خبرې کړي
نور ولولئ: د ټاپي پروژې چارې ولې ځنډېدلي دي؟
دې وزارت زیاته کړې چې په وروستي یو کال کې د کوچنیو او منځنیو تشبثاتو د پیاوړتیاو او هوکړه لیکونو لاسلیک له لار ې په ټولیز ډول ۶۴۶ زره او ۱۵ کسانو ته په مستقیم او شاوخوا څلور میلیونه او ۴۱۸ زره او ۷۵۰ نورو کسانو ته په غیر مستقیم ډول د کار زمینه برابره شوې ده.
د صادراتو او وارداتو ارزښت
دا په داسې حال کې ده چې د طالبانو د احصایې او معلوماتو ادارې هم د روان کال وري میاشتې ۲۶مه د افغانستان د صادراتو او ورداتو (لېږد-رالېږد) ارزښت د تېر لمریز کال په اوږدو کې (۱۴۰۲) ۱۰.۳ میلیونه ډالره اعلان کړی و.
د دغې اداره په وینا، تېر کال د صادراتو ارزښت یو میلیارد او ۷۷۷ میلیونه او ۹۰۰ زرو او د ورداتو ارزښت اته میلیارده او ۵۷۶ میلیونه او ۳۰۰ زره ډالرو ته رسېدلی و.
خو پر دې سربېره پر افغانستان د طالبانو له واکمنېدو سره سم خلک د فقر وروسته کرښې ته رسېدلي او د هرې ورځې په تېرېدو په هېواد کې د بې روزګارۍ کچه هم لوړېږي. د چارو پوهان پر طالبانو نیوکه کوي چې د افغانستان د اقتصاد برخې تصمیم نیونکي یې هم ملایان دي، له همدې امله په دغه هېواد کې د بې روزګارۍ د کابو کولو لپاره هېڅ برنامه هم نه لري.
